PEER-OES KLEINER, KLEUR BETER

Met peer-oestyd iets van die verlede is dit duidelik die droogte eis sy tol ten opsigte van ’n ligter oes en kleiner vrugte.

Volgens mnr. Jacques du Preez, bestuurder van handel en markte by Hortgro, het die boorde wat die afgelope vyf jaar geplant is en jaarliks groter oeste dra, die werklike uitwerking van die droogte verbloem in die totale volume wat die bedryf geproduseer het.

Hortgro skat sowat 16,3 miljoen kartonhouers pere gaan uitgevoer word teenoor verlede jaar se 17,47 miljoen houers. “Ons verwag die totale produksie vir 2018 gaan 10-12% laer wees en die uitvoervolume 8-10%.”

Hy sê al was die vrugte kleiner, was die kleur vanjaar beter.

Sowat 50% van die pere wat hier gekweek word, is verlede jaar na Europa (37%), die Midde-Ooste (18%), Rusland en die Verre Ooste (16% elk) uitgevoer.

Daar is onontginde potensiaal in China, maar totdat Suid-Afrika daar toegang kry, bly Europa die steunpilaar. Die plaaslike mark hou ook potensiaal in. “Vergeleke met peerverbruik per kop in ander wêrelddele is ons maar swak verbruikers.”

Argentinië en Chili is SuidAfrika se voorste mededingers, dog met die vermoë en tegnologie van Europese boere om vrugte langer te kan opberg, raak SuidAfrika se “uitvoervenster” jaarliks al hoe korter.