LUGBESOEDELING LEI TOT DUURDER PLAAGMIDDELS
Die swakker rand en China se strewe om sy erge lugbesoedeling hok te slaan, gaan vanjaar tot ’n skerp verhoging in die prys van landbouchemiese middels lei, waarsku mnr. Corné Louw, senior ekonoom by Graan SA.
Louw sê die aktiewe bestanddele van byna alle onkruiddoders moet ingevoer word en dat die meeste van dié
bestanddele in China vervaardig word waar nuwe wetgewing aanlegte se toelaatbare besoedelingsvlakke vir die laaste agt maande erg ingeperk het. “Talle van die aanlegte het toegemaak en omdat daar nou minder aktiewe bestanddele in die mark beskikbaar is, het pryse baie gestyg.”
Dit het ’n regstreekse impak op landbouchemiese produkte. Die prys van glifosaat, die aktiewe bestanddeel van Roundup, het byvoorbeeld met 40% gestyg en die prys van atrasien (’n inhibeerder van fotosintese) met 43% teenoor die ooreenstemmende tyd verlede jaar.
Louw sê boere moet kennis neem van hierdie prysneigings en met hul verskaffers praat om, waar moontlik, voorraad te koop wat nog teen ou pryse gekoop is. Hy sê dit is ook belangrik om te onthou dat die besoedelingswetgewing net op produkte met Chinese bestanddele van toepassing is.
Daar is produkte waarvan die aktiewe bestanddele in Europa vervaardig word. Daardie produkte se pryse behoort nie so skerp te styg nie, sê hy.