Bewaringslandbou hiér in die soeklig
Van 4 tot 6 September vanjaar bied die geenbewerkingsklub ’n konferensie op Bergville in KwaZulu-Natal aan. Die klem val op dekgewasse en hoe dit by ’n geenbewerkingstrategie inskakel.
Die geenbewerkingsklub se konferensie is ’n hoogtepunt op die Suid-Afrikaanse landboukalender. Die klub bring elke jaar kundige sprekers en werktuie, wat geskik is vir die minimum grondversteuring, en boere byeen.
Produsente in KwaZuluNatal het besef hul gevestigde graanproduksiepraktyke van intense grondbewerking is nie volhoubaar nie. Weens grondbewerking het erosie in sommi- ge seisoene tot onaanvaarbare grondverliese gelei. Die bewaring van grondvog en die herstel van biomassa, organismes en mikrobes in die grond is mikpunte van dié groep boere. Die geenbewerkingsklub is juis gestig om geenbewerking as ’n volhoubare oplossing te ondersoek.
Die aanvanklike doelwitte is elke seisoen ondersoek en ’n werkbare toepassing van praktyke vir bewaringsbewerking is oor die jare verfyn, waaronder die gebruik van dekgewasse saam met ’n veekomponent. Die bevindinge is eindelik op ’n konferensie onderling en aan ander boere oorgedra.
Met verskeie boere landwyd wat by die geenbewerkingsklub kom kers opsteek het, is talle soortgelyke klubs gestig, soos dié by Ottosdal en Reitz.
Die konferensie sal onder meer kyk na die noodsaaklikheid daarvan om jou grond te ondersoek met behulp van ontledings. Dit sluit in hoe om vas te stel hoe ernstig jou grond verdig is voor jy met ’n bewaringslandbouprogram wil begin.
Verskeie sprekers wat in die praktyk staan, en navorsers gaan die beginsels van ’n bewaringslandboustelsel gegrond op minimale grondversteuring, die skep van ’n beskermende deklaag – waaronder dekgewasse – en ’n wisselboustelsel, bespreek.
Daar sal ook inligting wees oor hoe om ’n meer biologies diverse en geïntegreerde gewasen-veeboerdery-onderneming op jou plaas te vestig.
Die registrasiekoste beloop R2 950 (voor 24 Augustus) en R3 250 (ná 24 Augustus) vir klublede. Nie-lede se koste vir die drie dae beloop R3 100 (voor 24 Augustus) en R3 300 (ná 24 Augustus). Besoek www.
notillclub.com vir die volledige program.