Rampdroogte dreig in Oos-Kaap, Klein-Karoo
DIE uitmergelende droogte in die Klein-Karoo stuur af op ’n ramp vir plaas- en dorpsmense, sê mnr. Joey Potgieter, volstruisboer en voorsitter van Agri Klein-Karoo.
Hy sê sakemense kry swaar en in die volstruisbedryf is mense besig om hul werk te verloor weens dalende volstruisgetalle. “Slaggetalle sal na verwagting daal van 150 000-160 000 volstruise in 2017-’18 tot 110 000120 000 vir hierdie seisoen wat in Julie begin het.”
Volgens Potgieter is daar sedert November nie reënval om van te praat nie, “4 mm hier, 7 mm daar” en net 7,5 mm vir Julie. Boonop was dit baie warm.
Hulle kry gewoonlik deur die hele jaar reën, maar volgens die jongste langtermynvoorspelling gaan reënval tot Desember ondergemiddeld wees en temperature bogemiddeld. “Daardie kombinasie voorspel niks goeds nie,” sê Potgieter.
Alle riviere staan en die damvlakke is so laag dat die distriksmunisipaliteit Eden finansiering soek om alternatiewe waterbronne te ontgin. Watergebruik sal na verwagting tot drinkwater beperk By Calitzdorp, ’n buurdorp van Oudtshoorn, is die Gamkapoortdam dolleeg. Potgieter sê dis die eerste keer dat dit gebeur sedert die dam in 1962 gebou is.
Potgieter sê omdat dit so droog is, die damme nie water het nie en die voorspelling so ongunstig is, is die tyd om lusern te vestig amper verby sonder dat boere veel geplant het. Saadmaatskappye wat gewoonlik by Oudtshoorn kontrakte uitreik om groentesaad te kweek, moes vanjaar die kontrakte na ander dele van die land skuif.
“As ons nie water het nie, het ons nie ander geleenthede nie. Die droogte is die ergste in ’n lang tyd.”