DIS MOS HEMEL OP AARDE!
Manne, kom ons lig die hoed en salueer Landbouweekblad wat al dekades lank die boer en sy plaas op die podium hou. Dankie, LBW, dat julle ons deurentyd op die hoogte hou van die jongste verwikkelinge rakende onteiening sonder vergoeding.
Dié bedreiging het ’n uiters nadelige uitwerking op elke eienaar van eiendom. Niemand weet of hy in die visier is nie.
Om te dink dat dit wat jy op skuld gekoop en jou hele lewe lank aan afbetaal het, eensklaps die eiendom kan word van iemand wat nie ’n dag se werk verrig het nie, skep ’n gevoel van rebellie en verset.
Is pasella huise, munisipale geriewe, skole, universiteite, hospitale en gesinstoelaes nie hemel op aarde nie?
Van die miljarde rande wat voor en ná die onafhanklikheid wording van die voormalige Transkei, Bophuthatswana, Venda en Ciskei deur die Land Bank aan swart boere geleen is om beeste te koop, is daar geen teken nie. Van opstalle van onteiende plase wat by die tuislande ingelyf is, is daar nie ’n teken sigbaar nie.
Sedert 1994 is daar weer honderde miljoene rand aan opkomende swart boere geleen om beeste te koop. Daar was weiding, maar boere het geweier om huurgeld te betaal aan konings, hoofmanne en kapteins.
Wat het geword van die honderde miljoene rand se trekkers en gereedskap wat herhaaldelik aan die agtergeblewenes geskenk is? Waar moes hulle geploeg en geplant het as daar nie grond vir hulle was nie?
’n Oudit van die Land Bank sal bewys hoeveel geld daar tussen neus en ore verdwyn het.
Die vraag is wie hierdie keer gaan probeer boer. Voornemende fortuinsoekers kan gerus kennis neem dat die plaasopstalle wat hulle in die oog het, met oorname erger sal lyk as die oorblyfsels wat die Engelse tydens die Anglo-Boereoorlog vir boere gelos het. GAWIE RICHTER Modimolle