MABUZA: ‘JULLE MOET PLOEG EN PRODUSEER’
‘Die ANC sal nie grondgrypprosesse steun wat gerig is op die ondermyning van die ekonomie en die landbou nie.’
TE midde van versoenende gesprekke tussen die georganiseerde landbou en regeringslui verlede week, asook ’n voorneme binne die georganiseerde landbou om ’n gesamentlike toekomsplan uit te kerf, het Landbouweekblad en Agri SA se beraad oor grond-oplossings ook op ’n hoë noot begin.
Adj.pres. David Mabuza het boere gevra om voort te gaan om voedsel te kweek en in hul plase te bly belê.
“As die reën geval het, wil ons stof sien (soos boere begin ploeg),” het Mabuza op die beraad in Bela-Bela gesê. “Ek wil julle aanmoedig om aan te hou boer; niks sal daardie produksie ontwrig nie.”
Mabuza het boere op dié manier probeer gerusstel oor vrese ten opsigte van onteiening sonder vergoeding. Hy het boere ook gevra om betrokke te raak by grondhervorming deur hul vaardighede en kennis aan opkomende boere oor te dra.
Hy het gesê grondhervorming moenie tot maatskaplike en rasseverdeling lei nie, en ook nie ’n bedreiging vir die landbousektor en die ekonomie wees nie. “Pleks daarvan dat dit ons verdeel, moet dit ons versterk.”
Mabuza het die onderneming gegee dat alles wat vir grondhervorming gedoen word, in ooreenstemming met die Grondwet en wetlike raamwerke sal wees. “Die ANC sal nie grondgrypprosesse steun wat gerig is op die ondermyning van die ekonomie en die landbou nie.”
Hy het hom uitgespreek teen diegene wat die “netelige en emosionele” grondhervormingskwessie gebruik om Suid-Afrika te verdeel, deur “ons grondhervormingsmaatreëls vir die internasionale gemeenskap te verwring en die vals boodskap te versprei dat wit boere ’n aanslag van hul eie regering ervaar”.
“Dit is glad nie waar nie,” het Mabuza gesê.
Volgens hom erken die Regering die belangrikheid van die landbou as ’n belangrike steunpilaar van die ekonomie en voedselsekerheid.
Mabuza het egter ook die be-
langrikheid van die regstelling van die ongeregtighede van die verlede benadruk en gesê as dit nie betekenisvol gedoen word nie, gaan dit tot onstabiliteit en onbedoelde gevolge lei.
“Ons het geen ander keuse as om die saak te benader met ’n erkenning dat ons saam in hierdie situasie is nie.”
Mabuza, voorsitter van die interministeriële komitee oor grondhervorming, gaan aan pres. Cyril Ramaphosa voorstel dat leiers van Agri SA, TLU SA, die African Farmers’ Association of South Africa (Afasa) en die National African Farmers’ Union (Nafu) in die paneel van kundiges dien wat die komitee gaan adviseer.
Mnr. Dan Kriek, voorsitter van Agri SA, het die grondberaad geopen en verwys na ’n verklaring van voorneme om verantwoordelikheid vir grondhervorming te aanvaar. (Sien
berig hiernaas.) Kriek het gesê die vorige politieke bedeling het groot lyding vir mense gebring. Om hul waardigheid nou te herstel, is dit nodig om hande te vat.
Die oplossing vir die ekonomiese probleme is om die Nasionale Ontwikkelingsplan in werking te stel en met ’n plan vorendag te kom waardeur grond vir behuising in landelike gebiede, nywerheidsontwikkeling en swart boere beskikbaar gestel kan word.
“Ons kan dit op ’n volhoubare manier doen, sonder om die balans te versteur en mense bang te maak.”