Ontwikkeling van kleinboere verminder Spar se vervoermyle
DIE Spar-winkelgroep het sy model vir aankope van vars produkte só verander dat hy produkte by kleinboere naby sy winkels kan koop. Só maak die groep sy verskaffersgrondslag meer inklusief, hy help om armoede in landelike gebiede te verlig en verkort die lang afstande waaroor vars produkte vervoer word.
Mnr. James Lonsdale, nasionale bestuurder van vars produkte, het op die PMA Fresh Connections-konferensie in Pretoria gesê een van die probleme van Suid-Afrika se voedselstelsel is dat groot, kommersiële plase meestal supermarkte se bron van vars produkte is.
Produkte word in groot maat na sentrale verspreidingsentrums gebring. “Die tradisionele verskaffingskettings en voedselmyle is baie lank. Groot kommersiële plase neig om die mark te oorheers, terwyl kleiner boere sukkel om formele waardekettings te betree.”
Terselfdertyd koop arm mense min vars vrugte en groente.
Spar wil deur die skep van landelike spilpunte die beskikbaarheid en bekostigbaarheid van vars
produkte verbeter.
Deur die model bevorder hy meer plaaslike verkryging van vars produkte en word opkomende kleinboere betrek.
As voorbeeld het Lonsdale die omgewing van Letsitele genoem, waar produkte voorheen drie dae lank oor 1 400 km vervoer is, maar nou, danksy die nuwe model, net 40 km ver vervoer word. Korter afstande is nie net goedkoper nie, maar bevorder ook die produkte se varsheid en raklewe.
Die kriteria waarvolgens Spar die liggings van spilpunte kies, sluit in groot getalle opkomende kleinboere wat marktoegang en ontwikkelingsteun nodig het, hoë landboupotensiaal, groot landelike armoede, baie Spar-winkels, en beskikbare mentorskap deur kommersiële boere.
Spar is betrokke by die finansiering van kleinboere se produksiemiddele omdat kleinboere nie verblyfsekerheid het nie en dus nie banklenings kan kry nie. Spar het ook ’n voedselveiligheidsprogram ingestel, bekend as LocalGAP, wat deur GlobalGAP onderskryf word.