HOOGTEPUNTE
AB InBev het in Mei ’n indrukwekkende robotstelsel by CenGen geplaas. Die plasing maak deel uit van die ondernemings in die openbare belang wat AB InBev aan die Suid-Afrikaanse Regering gemaak het toe dit in 2016 met SABMiller saamgesmelt het (sien KASSIE ). Die stelsel kan baie mense se werk baie vinnig doen en sodoende navorsers meer tyd gun om die data te ontleed.
Met die robotstelsel wat so ’n groot verskil kan maak, kan ’n mens maklik CenGen se ander prestasies miskyk. Dr. Renée Prins, eienaar van CenGen, het vir die tydperk 2013 tot 2018 ’n NRF-gradering gekry, al werk sy nie heeltyds by ’n akademiese instelling nie.
CenGen het die 2016/2017 NSTF-South32prys ontvang in die kategorie vir navorsing wat in klein, medium- of mikro-ondernemings tot innovering lei.
Finansiering vir die maatskappy se poging om ’n siekteweerstandsgeen in koring te kloneer, het ’n hupstoot gekry toe ’n Du Point Pioneer Open Innovation-navorsingsprys in 2018 aan CenGen en ’n medewerker, prof. Simon Krattinger van King Abdullah University of Science and Technology (KAUST) in Saoedi-Arabië, toegeken is.
Aan die begin van die jaar was CenGen een van die Suid-Afrikaanse instellings wat toonaangewende navorsingsinstellings in Brittanje op uitnodiging van die Britse Hoë Kommissariaat en AgBiz Grain besoek het om samewerking tussen koring -en garswetenskaplikes te verbeter.
Pretorius sê CenGen het die afgelope klompie jare waardevolle bydraes gelewer tot die identifisering, karakterisering en toepassing van roesweerstandsgene in koring, veral wat geelroes en stamroesbestandheid betref. Prins moes plaaslike en internasionele samewerking en finansiering kry om dit te laat gebeur. “Haar suksesvolle bedinging vir geld vir die MSL by die Wintergraantrust dien as bewys van die beleggings en onderbou wat oor jare heen in dié tipe navorsing gesit is.”
Haar insette is meer versiende as net molekulêre genetika. Aangesien sy besef watter enorme hoeveelhede data genetiese navorsing deesdae voortbring, en sy bekommerd is dat die huidige geslag nie opgelei is om soveel data te ontleed en te verstaan nie, is sy besig om ’n bioinformatika-werksessie vir navorsers te organiseer.