GEKLOONDE KORINGGEEN VIR DIE TOEKOMS
Dis nie net ’n kwessie van roetine-ontledings in CenGen se laboratorium nie. Die span is druk besig met die eerste poging om ’n siekteweerstandsgeen in koring in Suid-Afrika te kloneer, sê dr. Renée Prins. “Die voordeel daarvan is dat as jy ’n geen se presiese volgorde het, jy nie met merkers langs die geen hoef te werk nie, en kan jy akkurater werk. As ’n merker langs ’n geen is, kan jy maklik uitkruising tussen die geen en die merker kry wat veroorsaak dat die merker nie akkuraat kan voorspel of die geen teenwoordig is nie. Maar van ’n gekloneerde geen kan jy perfekte merkers vir die geen ontwikkel, want jy het toegang tot sy hele DNS-volgorde.
“Dis ons vlagskipnavorsingsprojek en ’n manier om nuwe kennis te vestig. Dit sal ’n groot prestasie wees as ons dié nuttige geen in die moeilike koringgenoom, met al sy herhalende volgordes, kan kloneer.”
Die belang van die projek word beklemtoon deur die buitelandse medewerkers se gewilligheid om te help, asook deur Pioneer
Du Pont se Open Innovation-projek se bereidwilligheid om sekere aspekte te finansier.
Wat hulle werk in die geheel beperk, is dat merkers vir belangrike eienskappe, soos opbrengsgene of droogtegene, nog baie beperk is. Gelukkig werk heelparty internasionale groepe daaraan en Prins glo dit gaan kom. “Ons het jare gelede nie geweet waar siekteweerstandsgene vandaan gaan kom nie, en nou weet ons waar Kariega se drie gene vir weerstand teen geelroes is en is hul merkers bekend.”
Hoewel CenGen as ’n klein, onafhanklike laboratorium hard moet werk om raakgesien te word en wye erkenning te geniet, kan dit in sekere gevalle tot sy voordeel werk. Soms doen geleenthede vir spesifieke ontledings hulle voor, soos nou met die kloningswerk, maar dan moet besluite vinnig geneem word en geld oorbetaal word sonder om tyd te verloor aan burokratiese rompslomp en lang besluitnemingskettings. Dis waar CenGen se buigsaamheid help om vinniger te vorder. Een van CenGen se grootste bates is egter sy klein, maar hoogs doeltreffende span navorsers.