REUSE-INSPUITING
Dr. Renée Prins sê CenGen werk nou saam met verskillende buitelandse medewerkers. Navorsingsresultate word aangeteken om gepubliseer te word in internasionale wetenskapsjoernale wat aan portuurevaluering onderwerp word.
Sy sê hulle doen ook hul bes om aan internasionale finansieringsgeleenthede deel te neem. “Die grootste probleem is dat nuwe tegnologie waarvoor dikwels gespesialiseerde apparaat benodig word, duur is en ook gou verouder en irrelevant raak. Dit is dus baie moeilik vir Suid-Afrikaners om by te hou omdat die meeste finansieringsliggame in die landbou nie kapitaalbeleggings finansier nie.
“Die plasing van die robot by CenGen is ’n reuse-inspuiting in ’n veld wat totaal ondergefinansier is.”
Sover aan haar bekend, is daar net een maatskappy in die toegepaste landbouomgewing
in Suid-Afrika wat soortgelyke apparaat het; hulle fokus op groentesaadproduksie. “Wat betref ’n laboratorium wat dienste aan die plaaslike graanbedryf lewer, is dit ’n eerste.”
Hoewel die dienste in die buiteland beskikbaar is, is dit nie regtig prakties haalbaar om monsters op ’n roetinegrondslag oorsee te stuur nie.
Deur die infrastruktuur nou plaaslik beskikbaar te hê, kan die data baie vinnig voortgebring word sodat telers binne ’n paar dae oor duisende plante se “geen-inhoud” ingelig kan wees sonder dat hulle dit al op die land kon waarneem. “Telers ken dus die inhoud van die lyne terwyl dit nog jong groen plante op die land of in die kweekhuis is.”