VERLAAG KOSTE
Die apparaat maak dit moontlik om baie meer datapunte voort te bring deur derduisende plante gelyktydig in ’n kort tydperk met dieselfde getal personeellede te ontleed. “CenGen se opgeleide personeel kan nou meer tyd aan ontleding bestee. Die robot genereer die data. Ons kan aangaan met die dinkwerk.”
Die reaksievolumes waarin van hierdie datapunte voortgebring word, is 1 mikroliter (1 000 mikroliter is 1 milliliter). “Dis ’n spikkeltjie van ’n druppeltjie, en help om die koste van die reaksie ook drasties te verlaag.”
Prins sê die robot skakel menslike foute uit deurdat dit meer as duisend monsters in die regte buisiegaatjies plaas en daar nie ’n kans is dat monsters omgeruil kan word nie.
Sy sê LGC, die Britse maatskappy wat die robotstelsel vervaardig, het ook drie spesialiste na Suid-Afrika gestuur om intensiewe opleiding aan CenGen se span te gee. “Die kennis en selfvertroue om met hierdie apparaat te werk, sal noodwendig die span in ’n posisie plaas om nog nuwer ontwikkelings vinniger te kan ‘verteer’.”
Mnr. Francois Smit van Sabbi sê met die nuwe toerusting sal dit moontlik wees vir Sabbi om merkers vroeër in die program te gebruik. Dit sal ook help om nuwe merkermetodieke te toets, byvoorbeeld in genomiese seleksie, wat die opbrengs van ’n teellyn kan bepaal van slegs ’n enkele stukkie blaar. “Natuurlik is dit nie so eenvoudig nie. Daar moet eers modelle gebou word.”
Prof. Zakkie Pretorius van die Universiteit van die Vrystaat sê die nuwe apparaat sal die doeltreffendheid van CenGen se DNS-werk eksponensieel verhoog. “Dit skakel in by die bestaande SNP-merkerplatform en haal grootliks menslike insette in roetinetake uit. Daar is ook die strepieskode naspeurbaarheid van elke DNS-monster wat deur die proses gaan.”