Groot oes in die Oos-Kaap
Vanjaar se wenner in Cradock Saadverspreiders se 20 ton-klubmieliekompetisie vir die suidelike streek spog met ’n oes van 22,60 ton per hektaar.
Leon Ontwikkelings BK het vanjaar met die louere weggestap in Cradock Saad se 20 ton-mieliekompetisie vir die suidelike streek. Mnr. Leon Scheepers en sy seuns boer op die plaas Dassiedeur in die Groot Visriviervallei suid van Cradock.
Dié maatskappy spog met ’n ryke geskiedenis en is in 1965 gestig. Die Scheepers-familie boer egter wel al sowat 130 jaar met fynwol-Merino’s. Hul oupagrootjie het die eerste ramme self uit Frankryk ingevoer. Die ras het destyds as Rambouillet-skape bekend gestaan.
Hoewel Leon aan die stuur van sake is, is sy seuns by verskeie afdelings betrokke.
Leon sê kennis is die sleutel tot sukses in ’n moderne boerdery en hy is baie trots op sy seuns. Hy het ’n B.Com.-graad in bemarking en het sy seuns aangemoedig om te studeer. Pierre is ’n meganiese ingenieur en ’n kenner van die integrasie van tegnologie by werktuie.
Roché boer op die familieplaas Uitkyk, in die distrik Somerset-Oos, hoofsaaklik met Merino’s en vleisbeeste en het ’n B.Agric.-graad. Morné behartig die syfers met sy M.Sc.-graad in landbou-ekonomie.
Hoewel hulle hoofsaaklik veeboere is, besproei hulle ook 214 ha onder spilpunte en pas wisselbou met lusern en mielies toe. Die marginale grond bevat ’n 7-in-1-weidingmengsel.
Die Scheeperse het besluit om nie hul oesreste te baal nie, maar laat eerder hul vee toe om dit op te vreet. Dit help om die grond se koolstofvlakke te verhoog en met die voervloei in die winter.
PLANTPROGRAM
Voor planttyd strooi hulle 2 ton gips en hoendermis saam met ’n mengsel van Cradock-saad wat stikstof, fosfaat en kalium (en ekstra sink, koper en swael) bevat, breedwerpig op die grond uit.
Dié mengsel is 36% gekonsentreerd, wat oor die algemeen baie hoog is. Hulle het geplant met 200 liter van ’n fosfaatmengsel met mikro-elemente, wat PH-neutraal is. ’n Ekstra mengsel van mikro-elemente wat sink, boor, molibdeen en seewier bevat, is saam gebandplaas.
’n Topbemestingmengsel van stikstof, kalium en swael is uitgestrooi met ’n Afgrifriend-strooier.
Blaarvoeding wat deur Metson verskaf is, is ook gebruik. Die Scheeperse het ook BASF se swamdoderprogram met die produk Abacus Advance (reg. no. L9132, Wet 36 van 1947), saam met Monsanto se Round Up Power Max (reg.no. L7769) gebruik.
Hulle het altesaam 227 kg stikstof, 55 kg fosfaat en 47 kg kalium gebruik.
“Dit is ’n konserwatiewe bemesting, gegewe die totale opbrengs wat gelewer is,” sê Leon.
“Ons kan dié goeie opbrengs net aan die genade van ons Hemelse Vader toeskryf. Ons het ook groot sukses behaal danksy Cradock Saad se kundige raad. Hulle het ons met raad en daad bygestaan.
“Monsanto se nuwe kultivar DKC 64-54 BR het ook ’n groot bydrae tot die goeie opbrengs gelewer. Ons het dit teen ’n plantestand van 76 000 plante per hektaar geplant.”
Die Scheeperse het Valley Irrigation se spilpunte gebruik, wat afwisselend kan besproei. Die spilpunt is ontwerp vir die toediening van 18-24 mm besproeiingswater op ’n slag. Hulle het 900 mm besproeiing vir die mielies gebruik naas die 140 mm reën wat hulle gekry het.
TEGNOLOGIE
Leon-hulle wou toegang tot tegnologie hê om doeltreffender te boer. Dus het hulle ’n 8 ry-planter met afwisselende toediening, asook ’n strooier en stroper met ’n opbrengsmonitor, gekoop. Hulle het deur kontrakwerk die tegnologie en werktuie van naburige plase teen vergoeding gebruik.
Leon kon probleemgebiede identifiseer danksy die elektroniese opbrengskaarte – nie net op hul eie plaas nie, maar ook op die sowat 500 ha van die boere wat hulle bedien het. Hul benadering is om uit almal se foute te leer en nie net uit hul eie nie.
Die Scheepers-familie het inderdaad ’n ryke geskiedenis, en met hul uitkyk op die boerdery kan ’n mens net ’n blink toekoms vir hulle voorspel.