VEEBEDRYF SPOG MET TOONAANGEWENDE EKSPO
’N WÊRELDKLASTENTOONSTELLING van die Suid-Afrikaanse veebedryf en sy waardekettings wag op besoekers aan die vyfde Agri-Expo Livestock. Die ekspo is oor die afgelope vier jaar gevestig as een van die toonaangewendste veeskoue in die land.
Vanjaar vind dit van 11 tot 13 Oktober op Sandringham buite Stellenbosch plaas.
Die nasionale kampioenskapskou van die SA Holsteingenootskap word die eerste keer daar gehou, die skou is die gasheer vir die grootste suiwelskou in Suid-Afrika én die grootste vleisbees-interraskampioenskap in sy soort vind ook daar plaas. Die FNB-Suiwelkoningin en die BKB-Rooivleiskoning word op Saterdag 13 Oktober aangewys.
Die program sluit ook Landbouweekblad se kompetisie vir versorgers en hanteerders, Old Mutual Insure se streekjeugskou, die Wes-Kaapse Boerboelskou, die Lenteskou van die Kaapse Konynklub en skaaphondvertonings in.
Mnr. Llewellyn Angus en dr. Faffa Malan is sprekers op Livestock se gratis melkbok- en vleisbeesinligtingsdae. Dié verrigtinge word deur die Wes-Kaapse departement van landbou en Standard Bank ondersteun.
Sowat 2 500 laer- en hoërskoolleerders van skole sover soos Kleinmond besoek jaarliks die ekspo vir ’n gratis skoleprogram.
Op die gelyklopende Groot Plaasproe-ekspo sal verskeie stalletjies plaaskos, wyn en boetiekbier te koop aanbied. Die Broers en ander gewilde kunstenaars tree op 13 Oktober op.
Verrigtinge vind daagliks vanaf 08:00 tot 18:00 plaas.
NAVRAE: Besoek www.livestock. org.za vir die volledige program. Kaartjies is by Computicket en by die hek beskikbaar. Agri-Expo, tel. 021 975 4440 of e-pos: admin@ agriexpo.co.za