BELOWENDE JAAR VIR VESELPRODUKSIE
VOORUITSIGTE vir die plaaslike veselmark lyk uiters belowend ná die hervatting van die veilings vir die nuwe bemarkingsjaar.
Mnr. Isak Staats, hoofbestuurder van BKB se wol-en-bokhaarafdeling, het verwag dat die openingsveiling in Port Elizabeth dieselfde hoë prysvlakke as die hoogtepunt van die sluitingsvei- ling sou handhaaf. Dit het met die heropeningsprysvlakke van die Australiese wolmark die vorige week ooreengestem.
“Die afsluiting van die SuidAfrikaanse wolmark teen die rekord-hoogtepunt van R230 per kg is op dieselfde hoë prysvlakke (R238,29/kg) voortgesit,” sê hy.
Bydraende redes vir dié neiging is ’n afname van sowat 8% in die Australiese wolproduksie wat deur ’n heersende droogte vererger word. “Die plaaslike wolproduksie het die afgelope tyd toegeneem en wol is wêreldwyd in aanvraag,” sê hy. “Ons mark het in die vorige bemarkingstyd in Junie 6% laer gesluit as die vorige jaar en tans lyk dit asof die plaaslike produksie aansienlik hoër gaan wees danksy die droogte wat oor ’n wye gebied verlig is.”
Die vraag na die Suid-Afrikaanse skeersel van sowat 20 mikron met ’n stapellengte van 60 mm tot 70 mm is volgens Staats baie hoog.
Nog ’n neiging van die Australiese markte wat na Suid-Afrika oorspoel, is dat groter klem op vleisproduksie in dié land gelê word. “Die Australiërs neig ook nou meer na dubbeldoelskape, soos die Dohne-Merino’s en gladdelyf-Merino’s.”
Volgens Staats maak die huidige vraag na vleis en vesel dit die ideale tyd om in die boerdery te belê.