VOERKRALE VERSKAF DIE MEESTE VLEIS
Die Suid-Afrikaanse voerkraalbedryf bestaan uit sowat 60 voerkrale met ’n gesamentlike vermoë van 420 000 beeste, het mnr. Danie Bosman, onafhanklike beesraadgewer, op die Winton-boeredag by Kathu in die Noord-Kaap gesê.
Die voerkrale voer 1,5 miljoen beeste en het ’n omset van R25 miljard per jaar. Saam produseer hulle 300 miljoen kg beesvleis (gemeet slegs aan groei in die voerkraal). Die Karan-voerkrale alleen slag 35 000 beeste per maand, oftewel sowat 400 000 beeste per jaar.
Sommige voerkrale het hul eie slaggeriewe. Suid-Afrika kan egter steeds nie genoeg beesvleis aan die bevolking voorsien nie. Sowat 250 000 speenkalwers word vanaf Namibië ingevoer.
Ongeveer 90% van die beesvleis wat in stede verkoop word, word in voerkrale geproduseer. Sowat 70% van Suid-Afrika se bevolking woon in stede en is dus van vleis vanuit voerkrale afhanklik.
Die verbruiker wat puik vleis soek, kan nie geïgnoreer word nie.
Sekere voerkrale wil reeds nie meer sekere beesrasse of kruise aanvaar nie omdat dié rasse se vleis volgens hulle nie van die gewenste gehalte is nie.
In Brasilië verander die bedryf ook weens die verbruiker se aandrang op gesogte snitte. Hulle rond gaandeweg ál meer Britse kruisbeeste af. ’n Sekere slaghuis in São Paulo verkoop byvoorbeeld slegs Bonsmaravleis. Hulle kan nie voorbly met die voorsiening van beter vleis aan die publiek nie.