SLEGTE NUUS OOR BRANDSTOF
Die slegte nuus oor brandstofpryse wil nie einde kry nie. Volgens alle aanduidings kom daar ’n sesde opeenvolgende prysverhoging in September vir petrol. Ná ’n geringe daling van 4c/ℓ vir diesel in Augustus begin die prys ook weer styg.
Mnr. Dawie Maree, hoof van landbou-inligting en bemarking by FNB, sê syfers van die Sentrale Energiefonds het middel Augustus gedui op ’n onderverhaling van ongeveer 5c/ℓ op diesel en 5–7c/ℓ op petrol.
“Hierdie onderverhaling is hoofsaaklik die gevolg van die swakker wisselkoers in die begin van die maand. Die verwagting is dus dat brandstofpryse op 5 September sal styg. Die grootte van die styging sal wees na gelang van hoe die wisselkoers oor die laaste helfte van die maand presteer. Soos die wisselkoers tans presteer, kan die verhoging selfs meer wees.”
Maree sê die styging sal opwaartse druk op voedselpryse en dus die verbruikersprysindeks plaas. “Die verwagting is egter nie dat die Reserwebank vanjaar aanpassings aan die rentekoers sal maak nie omdat die inflasieverwagtinge nog nie buitensporig hoog word nie.”
Hy sê die styging in die brand- stofprys is nooit goeie nuus vir boere én verbruikers nie omdat dit onmiddellik druk plaas op beskikbare kontantvloei en besteebare inkomste.
“Almal moet dus in hierdie opwaartse kurwe van koste noukeurig planne beraam en meer konserwatiewe besluite neem.”
Die prys van loodvrye petrol het inAugustustotR16,05/ ℓ gestyg en diesel se groothandelsprys in die binneland het op R14,40/ℓ gestaan.