VEEPRYSE ‘BEHOORT HOOG TE BLY’
Die vooruitsigte vir die stoetveebedryf en kommersiële diere oor die volgende agt tot tien maande is goed. Dieselfde hoë vlakke van stoetveepryse word op veilings ondervind as die eerste deel van die jaar, sê makelaars, ten spyte van die beter landboutoestande in groot dele van die land wat nog nie die vraag na stoetvee gedemp het nie.
Dr. Cobus Oberholster, hoofbestuurder van BKB se vee- en eiendomsafdeling, sê die dryfvere van hoë pryse, soos kuddebou ná die droogte, geld steeds om die vraag na goeie stoetvee te ondersteun. “Daar is beslis nog ’n tekort aan teeldiere ten opsigte van skaapboerdery.”
Sy waarneming op veilings dat Merinoramme met goeie wol en bouvorm hoë gemiddelde pryse behaal, is ’n goeie aanduiding van die siening van wol- en vleisproduksie.
BKB het sedert Julie tot 8 Augustus minstens tien stoetveeveilings aangebied waar hoë gemiddelde pryse behaal is. “Die prys vir ramme wissel van R13 000 tot R16 000 stuk,” sê hy. “Die prys van bulle is ook hoog, soos die onlangse verkoop van ’n Bovelder teen R300 000 op die veiling van Maritz en Boshoek Bovelders (sien Veiling van die Week) en ’n Bonsmara teen R340 000 op mnr. Arthur de Villiers se veiling.”
In die geval van kommersiële diere is die speenkalfprys steeds goed, wat die hoë bulpryse ondersteun.