SAkanChineseverbruiker sehartwen
CHINESE verbruikers se indruk van Suid-Afrika “is nog ’n skoon seildoek” en die land het ’n gulde geleentheid om ’n gunstige indruk te skep, sê ’n Chinese invoerder van vars vrugte.
“Julle kan enigiets skep wat julle wil. Julle kan ’n goeie indruk wek wat ’n premie vir jul produk kan verseker,” het mnr. George Liu, uitvoerende hoof van Frutacloud, op die PMA Fresh Connections-konferensie in Pretoria gesê.
Asoex, die Chileense vereniging van uitvoerders van vars vrugte, het verlede jaar meer as $5 miljoen belê om Chinese verbruikers meer bewus te maak van daardie land en sy kersies. Liu het gesê verbruikers het nou ’n baie gunstige indruk van Chili se natuurskoon.
POTENSIAAL
Me. Anouk Sijmonsman, die PMA se ondervoorsitter vir Asië, Afrika, Europa, Australië en Nieu-Seeland, het gesê daar is nog baie geleenthede vir vars produkte om te ontgin.
Die Chinese ekonomie groei steeds teen 6% en meer as die helfte van die bevolking woon in stede, waarvan sowat 21 miljoen mense in Beijing woon. Inwoners se inkomste verbeter steeds, verbruikers koop beter en vars kos, en hulle eis veilige kos.
Die probleme vir uitvoerders sluit in taal, die grootte van die land, die groot verskille tussen streke en tussen die megastede en ander stede, moontlike onderbrekings in kouekettings, asook logistieke probleme.
Voornemende uitvoerders moet ook besef daar is in China geen toegang tot onder meer Facebook, YouTube en Google nie.
Liu het egter gesê daar is toepassings wat in die plek daarvan gebruik word. “As jy in China wil sake doen, is die eerste ding wat jy moet doen, om WeChat af te laai.” Dit is ’n samevoeging van wat Facebook en WhatsApp bied.
Chinese “leef deur hul selfone”, het hy gesê. Verbruikers is gewoond daaraan om deur toepassings vir inkopies te betaal en dié toepassings bied waardevolle inligting oor verbruikerspatrone.
MEDEDINGING
Suid-Afrika kan appels, tafeldruiwe, lemoene, suurlemoene, pomelo’s en mandaryne na China uitvoer. Al dié produkte het mededinging van ander lande, buiten pomelo’s.
Volgens Liu is Australië ’n mededinger ten opsigte van mandaryne en lemoene, Nieu-Seeland met suurlemoene en appels, Peru met mandaryne en tafeldruiwe, en Chili met appels en in die toekoms ook mandaryne. Toekomstige mededingers vir die moontlike uitvoer van avokado’s is Peru en Chili, en vir pere is dit Argentinië en Chili.
China verbou self tafeldruiwe en appels.
Liu glo daar is goeie vooruitsigte vir Suid-Afrikaanse vrugte-uitvoer na China. Hy hoop dat die twee regerings egter aan protokolvereistes vir kouebehandeling kan aandag gee omdat dit vir invoerders probleme veroorsaak.
KEN DIE MARK
Liu het gesê as ’n mens vars vrugte na China wil uitvoer, moet jy heel eerste besluit of jy dit aan groothandelmarkte of kleinhandelaars wil verkoop. Die markte verkies bekende en gewilde produkte, voorkoms is belangrik en verbruikers kies handelsmerke op grond van hul vorige ervaring daarvan.
Die markte vereis ook baie sterk vrugte, wat die lang reis tot by die uiteindelike verbruiker sal kan oorleef.
Terwyl markte algemene kultivars van vars vrugte verkies, aangesien die lewering bestendig is, hou kleinhandelaars van ongewone of nuwe kultivars waarmee hulle klante kan lok.
Liu het gesê spesiale verpakkings, soos vir die Chinese nuwe jaar, en produkte met ’n storie, is ook gewild.