Tuin-tot-tafel bring nuwe hoop vir arm kinders
Met ’n klein begroting en ’n tuin vol plante het ’n maatskaplike werker en ’n dieetkundige ’n resepteboek vol sakpas-etes gepubliseer. Die tuin-tot-tafel-idee bring mense in aanraking met grond en help ook met kinderontwikkeling.
In die hart van Wallacedene, ’n arm Kaapse woonbuurt, is ’n rustige, groen oase waar eetbare en medisinale plante gekweek word. Sit jy vir ’n oomblik onder die jong moringaboompie, voel jy wêrelde verwyder van die raserige sjebien oorkant die straat, die moedeloosheid wat deel is van werkloosheid, en die desperaatheid wat drank- en dwelmmisbruik veroorsaak.
Dié kos- en medisinale tuin is deel van Learn2Live se Homegrown-projek, wat hom daarvoor beywer dat jong kinders behoorlik eet. “Nadat Learn2Live in 2010 tot stand gekom het, het ons navorsing gedoen oor die gemeenskap en besef vroeëkinderontwikkeling is ’n groot leemte in die gebied. Ons het ook navorsing gedoen oor wat nodig is om kinderontwikkeling te laat floreer, en het besef die eerste duisend dae van ’n kind se lewe is van kritieke belang vir sy of haar ontwikkeling. Kinders het stimulasie, liefde en voeding, wat die belangrikste is, nodig. Die navorsing bewys as ’n mens dít kan regkry, is ’n kind se kans beter om ’n ekonomies aktiewe volwassene te raak. Al ons projekte beklemtoon dus voeding en opvoeding,” sê me. Arina Kitching, projekbestuurder.
Learn2Live staan altesaam 512 vroeëkinderontwikkelingsentrums in Eersterivier en Kraaifontein by sodat hulle by die Departement van Maatskaplike Ontwikkeling geregistreer word om ’n regeringsubsidie te kry. Hul Brainfood-projek is ’n weeklikse program wat aan kinders wat nie toegang tot formele opvoeding het nie, genoeg stimulasie en gesonde etes gee. By die Wallacedene-gemeenskapsentrum het hulle ook ’n biblioteek met boeke, legkaarte en speelgoed wat aan die verskillende sentrums uitgeleen word om die leerderprogramme te ondersteun.
HANDE IN DIE GROND
In die Homegrown-tuin, ’n gesondheid- en welstandprogram vir gemeenskappe soos Wallacedene en Bloekombos, moet die kinders, wat gewoonlik uit hoëdigtheid-woonbuurte kom, leer waar iets, soos spinasie, vandaan kom, maar ook hoe om dit self te kweek én om dit voor te berei.
“Netafim het in 2012 betrokke geraak en dit het vir ons momentum gegee om nuwe hoogtes te bereik. Die maatskappy het die groentetuin ontwikkel wat ons vir ons kosen tuinkursus gebruik,” sê Arina.
Hulle hou ope dae, waartydens skole die tuin kom besoek en kinders leer waar groente vandaan kom, oor gesonde eetgewoontes en waterbesparing. Daar is ook opleidingsdae waar mense uit die gemeenskap kan kom leer hoe om kompos en tuin te maak op die kleinste spasie moontlik (selfs al het jy net ’n winkelsak of buiteband tot jou beskikking) en om hul opbrengs in die kombuis te gebruik. Só het hulle al meer as 100 tuine in die gemeenskap begin.
MAALTYE GOEDKOPER AS R4,50
Naas ’n reeks boekies deur die skrywer Anna Emm wat opvoedkundige boodskappe deur hul hoofkarakter, Felix, en sy verkleurmannetjie tuisbring, het Learn2Live pas ’n resepteboek bekend gestel vir skole-voedingskemas. Dis propvol goedkoop, gesonde resepte.
“’n Crèche se kosbegroting is dikwels vanaf net R4,50 per kind per dag. Dit voel amper onmoontlik om ’n kind behoorlik kos te gee met so min geld, maar ons het gemeen ons kan hulle help om meer te gee as net brood en margarien of mieliepap. Die meeste van ons resepte kos minder as R4,50 per kind, maar dis baie gesond en leer mense om uit die tuin te kook,” sê Arina.
Die boek word tans oor Suid-Afrika heen versprei deur Lunchbox, wat aan 800 skole kos voorsien. “Daar sal altesaam 1 000 van die resepteboeke versprei word en ons hoop dit gaan ’n groot impak op die land hê.”