BENUT TEGNOLOGIE TEN VOLLE

Afgesien van wetenskaplike tegnieke in die seleksie (spesifiek die ooiproduksieindeks en BLUP) en teling (kunsmatige en laparoskopiese inseminasie) van hul skape, probeer mnre. Frans en Andries Marx van die plaas Sewefontein tegnologie ten volle te benut waar hulle kan.

Almal wat by die boerdery betrokke is, het byvoorbeeld toegang tot ’n tweerigtingradio. “Ons hele boerdery is bewus van wat oral gebeur,” sê Andries. “Goeie kommunikasie met werkers is uiters belangrik.”

Afgesien van ’n Facebook-blad wat as ’n waardevolle bemarkingshulpmiddel dien (hulle het 20 902 mense en 9 000 besigtigings met die verkoop van die ram SD5-15 bereik), was dit WhatsApp wat werklik boere se vermoë om produkte en dienste te bemark, gerevolusioneer het, sê Andries. “Ek is betrokke by ’n aankoopgroep in die Suid-Vrystaat en in die Oos-Kaap, wat meer as 600 lede het,” sê hy. “Dit het die hele bemarkingsomgewing verander.”

Dan het die vermoë om akkurate weervoorspellings van die internet te kry,

dit nie net moontlik gemaak om geskeerde skape teen skielike koue (veral in die skeertyd in Julie) te beskerm nie. Dit het ook die benadering tot die verbouing van gewasse op die plaas fundamenteel verander. “Ons het besluit ons sal plant as dit reën, dus beweeg ons saam met die reën,” sê hy. “Jy kan nie bekostig dat jou landerye onproduktief is nie.”

Die volgende aankoop op die plaas gaan ’n hommeltuig wees om te help met die tel van vee en die nagaan van waterbronne. “Mens moet op hoogte bly van tegnologie.”