LAND BANK HET ‘STERK BALANSSTAAT’
DIE Land Bank het ondanks die droogte in die Wes- en Oos-Kaap stewige finansiële resultate in die afgelope boekjaar behaal.
Mnr. T.P. Nchocho, uitvoerende hoof, het met die bekendmaking van die 2018-resultate gesê bankpersoneel het baie tyd met boere in die droogtegeteisterde gebiede bestee om praktiese voorstelle te doen.
Van die bank se beskikbare R400 miljoen vir konsessielenings aan boere in droogtegeteisterde gebiede is transaksies van R334 miljoen goedgekeur.
Die bank het boere ook met buigbare bepalings en voorwaardes tegemoet gekom, het Nchocho gesê.
TRANSFORMASIE
Die bank se lenings om transformasie in die landbou te bevorder, het van R2,3 miljard in die 2014-’15-boekjaar tot R5,4 miljard in die afgelope boekjaar gegroei.
Nchocho het gesê opkomende boere se grootste struikelblokke is die beskikbaarheid van grond (wat hy meen deur staatsgefinansierde kanale verbeter kan word), die behoefte aan rentekoerssubsidies, ’n tekort aan vaardighede en toegang tot ’n afsetgebied of ’n mark.
Op grond van die betrokke boerdery-eenheid se finansiële posisie kan die bank dik- wels nie die volle bedrag leen wat ’n opkomende boer nodig het nie, maar die bank werk aan ’n samewerkingsooreenkoms met die Departement van Landbou, Bosbou en Visserye om toekennings in die departement se begroting daarvoor beskikbaar te stel.
BALANSSTAAT
Mnr. Bennie van Rooy, finansiële hoof, het gesê die bank se finansiële resultate en balansstaat is sterk.
Die bank se wins uit voortgesette bankbedrywighede het van R268,8 miljoen tot R278,7 miljoen gegroei, maar die wins uit die versekeringsbedrywighede het van R50,7 miljoen tot R11,5 miljoen gedaal.
Laasgenoemde was onder meer weens groot eise vir vloede en haelskade.
Die bank se nie-presterende lenings het van 7,1% tot 6,7% gedaal. Hy wil dit op 7% tot 10% hou.
Die bank wil voorts in die volgende drie tot vyf jaar sy transformasielenings van die huidige R6 miljard tot R16,5 miljard verhoog.