GM-tegnologie lewer meer mielies
’n Groot deurbraak in die saadbedryf die afgelope 50 jaar was die koms van geneties gemodifiseerde organismes (GMO’s). Monsanto beywer hom vir die ontwikkeling van tegnologie wat boere bevoordeel deur opbrengste en die gehalte van oeste te verbeter.
Monsanto het in 1995 die eerste Bollgard®-behandelde katoensaad in Suid-Afrika gekweek en na Amerika uitgevoer om daar verkoop te word.
In 1998 het Monsanto insekbestande mieliesaad onder die naam YieldGard® bekend gestel.
Dit is in 2000 opgevolg deur die eerste onkruidbestande Roundup Ready®-aanplantings van katoen en sojabone en in 2003 deur die eerste Roundup Ready-mielies.
In 2007 is Bt-Roundup Readymielies bekend gestel en in 2010 YieldGard MAIZE II, asook Genuity YieldGuard II met Roundup Ready-mielies 2. Die droogteverdraagsame DroughtGard®-tegnologie is onlangs ontwikkel.
Mnr. Arthur Schröder, produkbestuurder van Monsanto Afrika, sê die voordele van tegnologie, soos GMO, bied boere ingeboude beskerming teen plae, soos stronkboorder.
“Onlangs is bevestig dat dieselfde GM-tegnologie dit ook vir plante moontlik maak om herfskommandowurm die hoof te bied.
“Bt-mielies se toleransie teen herfskommandowurm is heeltemal doeltreffend en dit is deur die registrateur goedgekeur.
“Die voordele is eerstens die beskerming van die plant en dus die versekering van ’n goeie opbrengs teenoor die moontlikheid van ’n misoes.
“Tweedens haal dit die noodsaaklikheid van duur, chemiese behandeling van plante teen plae, soos stronkboorder of herfskommandowurm, uit die prentjie.
“Dit bespaar geld, arbeid en is omgewingsvriendeliker,” sê Schröder.
Hy sê bestaande Bt-tegnologie doen reeds baie om boere se opbrengste te beskerm.
“Deur stronkboorder te bekamp is daar min of geen skade aan die mieliekop nie en dus geen kans vir sekondêre kopbesmetting nie. Dit bring voordele op die mark omdat die boer meer gehaltegraan kan lewer.”
Voordele, soos stapelgeentegnologie, maak dit moontlik om ook sojabone teen spesifieke insekplae te beskerm én om die plant bestand te maak teen glifosaat wat gebruik word in onkruidbestryding.
Wat die oorname van Monsanto deur Bayer betref, is Schröder baie optimisties. “Dit ontsluit baie meer moontlikhede, hulpbronne en die opsies vir oplossings vir produsente.”
BESKERM TEGNOLOGIE
Die beskerming van tegnologie soos dié vereis die verantwoordelike gebruik daarvan volgens voorskrifte. Toevlugsgebiede maak deel van dié insekweerstandbestuur en -strategie uit.
Die plant van toevlugsgebiede is verpligtend ingevolge die voorwaardes wat deur die Departement van Landbou, Bosbou en Visserye daargestel is.
Weerstand ontwikkel nie vinnig in die natuur nie en word eers werklik ’n probleem nadat die meeste vatbare insekte oor baie geslagte heen en deur jare lange blootstelling aan een middel gevrek het.
Die oorlewende, weerstandige insekte plant dan voort en dra die weerstandseienskappe aan hul nageslag oor.
Met bogenoemde in gedagte is dit dus noodsaaklik dat Monsanto en die produsent die verantwoordelikheid saam dra en in ’n vennootskap staan om weerstand te voorkom.
Die boer moet dus ’n toevlugsgebied met byvoorbeeld mielies sonder die YieldGard-geen plant, sodat motte wat oorleef op die YieldGard-mielies, paar met motte sonder weerstand uit die toevlugsgebied. Die nageslag van die insekte sal dan weer deur die YieldGard-geen bestry word.
NUWE VOORDELE
“Nog iets waarna ons uitsien, is die driedubbele stapelgeen wat die DroughtGard-, YieldGard MAIZE 2- én Roundup Ready mielies 2-eienskappe sal insluit.
“Wanneer die relevante owerhede dit goedkeur, sal dit die eerste in sy soort in Suid-Afrika wees,” sê hy.
Met die groot belangstelling in herlewingslandbou is Schröder oortuig van die meriete van GM-tegnologie as deel van dié verbouingspraktyk.
Met minder of selfs geen chemikalieë kan plaagbestryding van byvoorbeeld stronkboorder in mielies bereik word. Waar dekgewasse nie benut word deur vee nie en die boer verkies om dit dood te spuit voor hy sy mielies of sojabone plant, is Roundup®-tegnologie ideaal vir die doodspuit van die dekgewasse.
YieldGard MAIZE 2, Roundup Ready MAIZE 2, DroughtGard en Roundup is geregistreerde handelsmerke van Monsanto (reg.no. L6790 kragtens Wet 36 van 1947).