Aussies se droë September is ‘slegte nuus’ vir SA saaiboere
DIE afgelope September was die droogste een in die geskiedenis in Australië, en dit kan ’n slegte teken vir Suid-Afrika wees.
Ongewoon hoë dagtemperature die afgelope jaar dra by tot dalende grondwatervlakke, wat reeds onder druk is weens die lae reënval, sê die Australiese buro vir meteorologie. Volgens die buro is die temperature wat tot dusver vanjaar gemeet is, die naaswarmste
in die geskiedenis. Temperature is vanjaar gemiddeld 1,36 °C hoër as normaalweg.
Die warmste jaar tot dusver in Australië was 2013, toe temperature gemiddeld 1,54 °C warmer was. Die streke Murray-Darling en Nieu-Suid-Wallis het albei die warmste Januarie tot September aangeteken, met temperature wat onderskeidelik 2,17 °C en 2,10 °C bo die gemiddelde was.
Die reënval was verlede maand in groot dele van dié land die laagste in die geskiedenis. Reënvalmetings was in plekke in die onderste 10% van historiese reënvalvlakke. In dele van die land heers ’n droogte al langer as twee jaar.
Mnr. Johan van den Berg, klimatoloog
van Santam Landbou, sê die reënvalsituasie in Australië is nie goeie nuus vir Suid-Afrika nie. “Die Julie-tot-Oktober-reënval in Oos- en Suid-Australië is sterk gekorreleer met die midsomerreënval in Suid-Afrika.”
Volgens Van den Berg moet dié hele tydperk se reënval in ag geneem word, nie net dié van September nie. “Die reënval vanaf 1 Junie vanjaar was maar ongeveer die helfte van die langtermyngemiddelde vir die tydperk.”
Voorspellings vir reën in Oktober lyk egter gunstig in groot dele van Australië, veral in die koringverbouingsgebiede van Queensland, Nieu-Suid-Wallis en Victoria.