BANKE ‘WIL VENNOTE WEES’
DIE Bankvereniging van Suid-Afrika (Basa) praat met die staat oor hoe finansiering aan opkomende boere verbeter kan word.
Mnr. Pierre Venter, hoofbestuurder van menslike nedersettings by Basa, sê die banksektor wil, waar moontlik, ’n belangrike vennootskapsrol in Suid-Afrika speel sodat grond- en landbouhervorming bewerkstellig kan word. Hy meen dit kan die land se skeefgetrekte grond- en maatskaplik-ekonomiese patrone omkeer.
Basa is volgens hom in ’n vroeë stadium van gesprekke met die Departement van Landbou, Bosbou en Visserye oor ’n dokument met voorgestelde beleid oor omvattende steun vir produsente-ontwikkeling, wat onlangs vir kommentaar bekend gemaak is. “Ons het met gesprekke begin om te bepaal of ons, saam met die Regering, die verskaffing van finansiering aan opkomende boere kan verbeter sonder om beleggersgeld en deposito’s te benadeel.”
VERBETER RISIKO SÓ
Pres. Cyril Ramaphosa het onlangs in sy herstel- en stimulusplan vir die ekonomie na “gemengde finansiering” vir opkomende boere verwys.
Venter sê só ’n samevoeging van staatsfinansiering of -steun en lenings deur die private sektor kan verskeie vorme aanneem.
Van die staat se kant af kan dit ’n vooruitbetaalde kapitaaltoekenning wees, en/of ’n gesubsidieerde rentekoers, en/ of ’n staatswaarborg om risiko te verminder, en/of ’n staatskema vir indeksoesversekering om oeste teen droogte of vloede te beskerm.
“Die gedagte is in wese om die risiko van ’n opkomende boer te verminder of sy winsgewendheid te verhoog tot ’n vlak waar kommersiële banke in staat is om steun te bied sonder om hul kommersiële haalbaarheid en volhoubaar te benadeel.
“Bankbare lenings is gegrond op die waarskynlikheid – op ’n redelike risikovlak – dat ’n lener in staat is om die skuld terug te betaal.”
Venter sê ’n ander moontlike manier om die risiko van bankbare moontlikhede te verbeter, is om ’n waardekettingbenadering te volg waar die hoofrisiko-aspekte soos produksievaardighede, marktoegang en afset van produkte verseker kan word.
–