VOLHOUBAARHEID VERGEMAKLIK
Boere behoort eersdaags toegang te hê tot Sherpa, ’n boerderybestuursprogram wat ontwikkel is om die ontwikkeling en toepassing van volhoubaarheidstrategieë te ondersteun. Mnr. David Farrell en sy span by Blue North is al ’n bykans ’n dekade lank gemoeid met die koördinering van verandering, met die klem op volhoubaarheid.
Sherpa is programmatuur wat die volhoubaarheidsraamwerk van ’n boerdery, die standaarde waarna gestreef word, die planne om dié standaarde te bereik, alle bedrywighede wat in ag geneem word binne hierdie aksieplanne, en selfontleding in ’n enkele struktuur saamvat.
“Sherpa is ’n aanlyn bestuurstelsel wat ontwerp is om boere by te staan in hul strategiese reis om die veerkragtigheid en lewensvatbaarheid van hul boerderye op lang termyn te versterk. In die proses om boerderye volhoubaarder te bestuur, het ons besef elke boerdery is uniek. Sherpa is ontwikkel om hierdie eiesoortigheid in die proses in te bou en steeds die boerdery veerkragtig, lewensvatbaar en volhoubaar te maak. Daar is regstreekse voordele, en dit dien ook as ’n goeie hulpbron om aan derdepartystandaarde, soos GlobalGap en Fairtrade, te voldoen,” sê Farrell.
Blue North is tans besig om met voornemende klante te skakel om die werking van die programmatuur vaartbelyn te maak.