BEDRYF OP ’N ‘GOEIE PLEK’

Die sybokhaarbedryf beleef tans ’n baie goeie seisoen met volumevlakke wat baie dieselfde is as verlede seisoen, terwyl pryse hoër is. Mnr. Riaan Marais, mediaen kommunikasiebestuurder van Sybokhaar Suid-Afrika, sê produksiegewys beloop vanjaar se skeersel sowat 2,4 miljoen tot 2,5 miljoen kilogram. Die totale waarde van uitvoer in 2017 was R1,5 miljard.

Marais meen die huidige seisoen kan weer op daardie vlak eindig. “Dit kan selfs effens hoër wees weens die goeie pryse wat boere tans kry. Die totale inkomste van die bedryf word egter eers ná die laaste veiling vanjaar bepaal. Daar is nog drie veilings oor,” sê hy.

“Die veiling wat einde September gehou is, het ’n gemiddelde prys van R292,27/kg gelewer. Vergeleke met die ooreenstemmende veiling verlede jaar, toe die prys R202,34/kg was, was daar ’n styging van sowat R90/kg. Dit is ’n teken van ’n groot vraag vanuit die buiteland na natuurlike vesels.

“Dit is nie noodwendig ’n unieke bokhaarsituasie nie, en ons sien dit ook in die wolmark.”

Intussen is die sybokhaarbedryf besig om na nuwe geleenthede te kyk, terwyl daar steeds groot aptyt vir Suid-Afrikaanse sybokhaar in die tradisionele uitvoermarkte van China, Italië en Taiwan bestaan.

“Die druk van diereregteorganisasies vroeër vanjaar het nog nie ’n noemenswaardige invloed op die vraag na sybokhaar gehad nie, maar ons hou die situasie dop. Sybokhaar Suid-Afrika bly in kontak met uitvoerders en ons kry steeds goeie ondersteuning van dié markte. Die komende seisoen sal ook ’n beter aanduiding kan gee van hierdie invloed. Intussen bevind die sybokhaarbedryf homself in ’n goeie posisie en ons sien uit na die komende seisoen,” sê Marais.