Waardasie-agterstand noodsaak ingryping
EIENDOMSWAARDEERDERS in private praktyk het die meeste van die waardasies vir die Regering se grondhervormingsprogram in die afgelope boekjaar gedoen.
Die kantoor van die grondwaardeerder-generaal, wat spesiaal in die lewe geroep is om sulke waardasies te doen, kon die afgelope geldjaar net R16,1 miljoen van sy begroting van R78 miljoen bestee. Dit blyk uit die waardeerder-generaal se eerste jaarverslag, wat pas uitgereik is.
Die kantoor is in Augustus 2015 gestig om “billike en regverdige” vergoeding te bepaal vir grond wat die staat wil bekom. Die eerste waarderings wat deur dié kantoor bekend gemaak is, is egter met groot teenkanting begroet.
Mnr. Christopher Gavor, waardeerder-generaal, sê in die oorsig van sy jaarverslag vir 2017-’18 die kantoor het met sy ontstaan net drie waardeerders van die Departement van Landelike Ontwikkeling en Grondhervorming gekry.
Weens kapasiteitsbeperkinge moes hy dus staatmaak op private waardeerders, en is die meeste waardasies wat van sy kantoor vereis is, deur die private sektor
gedoen. Luidens die verslag het die waardeerder-generaal wel elke waardasie hersien en verseker dat die gehalte daarvan na wens is.
Gavor sê die plan is dat sy kantoor in die toekoms al hoe minder van private waardeerders gebruik sal maak. Die kantoor se interne kapasiteit sal uitgebrei word.
Die kantoor se ongebruikte geld is na die volgende boekjaar oorgedra.