DIE ANDER SÊ
DIE wêreld se voorste klimaatwetenskaplikes het gewaarsku slegs sowat 12 jaar is oor om die gemiddelde aardverwarming tot 1,5 °C te beperk. Die risiko van droogte, vloede, uiterste hitte en armoede vir honderde miljoene mense sal daarna aansienlik styg.
Dié bevinding is vervat in die verslag van die Verenigde Nasies se interregeringspaneel oor klimaatsverandering (IPCC) wat op 8 Oktober bekend gestel is ná goedkeuring by ’n finale sitting van ál 195 lidlande in Suid-Korea.
Sedert opdrag vir die verslag in 2016 by die Parys-klimaatonderhandelinge gegee is, het die gaping tussen die wetenskap en die politiek vergroot. Pres. Donald Trump van Amerika het onderneem om sy land – die grootste bron van historiese kweekhuisgasvrystellings – aan die Parys-akkoord te onttrek, en dit raak al hoe waarskynliker dat Brasilië dieselfde kan doen.
Die wetenskaplikes het bevind dat teen ’n verwarming van 1,5 °C kan die deel van die wêreldbevolking wat aan waterstres blootgestel is, 50% laer wees as teen 2 °C. Voedselskaarste sal ’n geringer probleem wees en honderdmiljoene minder mense, veral in arm lande, sal klimaatverwante armoede ervaar.
Die wêreld is tans 1 °C warmer as voor die nywerheidsomwenteling en na aanleiding van die verwoestende storms in Amerika, die rekorddroogte in die Wes-Kaap en bosbrande in die Noordpoolsirkel maak die IPCC dit duidelik dat klimaatsverandering reeds aan die gebeur is. Die paneel wat die verslag saamgestel het, haal nagenoeg 6 000 wetenskaplike verslae aan.