AGRI SA KRY JAWOORD VIR SY PLANNE
AGRI SA se bestuur het in ’n groot mate die groen lig by sy kongres gekry om voort te gaan met sy holistiese plan vir grondhervorming en landbouontwikkeling wat in 2014 saamgestel is, asook finansieringsplanne wat in die volgende jaar opgestel is.
Die klem van die holistiese plan is Agri SA se verbintenis tot planne en voorstelle waardeur die landbousektor ’n leidende rol in volhoubare grondhervorming kan speel, die ontwikkeling van entrepreneurskap en die maatskaplike opheffing van plaaswerkers en -gemeenskappe.
Dit moet strook met die Grondwet, die Nasionale Ontwikkelingsplan ondersteun en die diversiteit binne die landbou erken.
Van die elemente sluit in ’n spesiale medium vir die uitvoering van die plan, ontwikkelingsfinansiering, vennootskappe, ’n maatskaplike verdrag, steun vir boere in kommunale gebiede en volhoubare grondhervormingsmodelle.
Die finansieringplan is op sy beurt gegrond op gesubsidieerde kapitaal en ’n fonds wat deur die Regering gewaarborg word.
VOORBEHOUDE
Mnr. Willem de Chavonnes van Agri Noordwes het gevra dat een aspek van die holistiese plan – ’n besluit ten gunste van die reg op die eerste weiering vir die staat wanneer grond te koop aangebied word – verder bespreek moet word. Agri SA moet dan later weer aan die kongres verslag doen oor sy aanbeveling in dié verband.
Mnr. Dan Kriek, herverkose voorsitter van Agri SA, het in antwoord op ’n vraag van mnr. Daan Venter van die Vrystaat bevestig die organisasie het geen magte om namens individuele boere te onderhandel nie.
Mnr. Ernest Pringle van die Oos-Kaap het gesê distriksgrondkomitees werk nêrens in die praktyk nie en moet hersien word.
Dr. Theo de Jager, ’n voormalige voorsitter van Agri SA se grondkomitee,
het voorgestel Agri SA moet aandring op markverwante vergoeding.
Mnr. Jannie de Villiers, uitvoerende direkteur van Graan SA, het gevra die klem moet na die inwerkingstelling van die planne verskuif. “Die Regering vra die georganiseerde landbou se hulp met die inwerkingstelling van transformasieplanne en ons kan nie dié hand wegklap nie. Êrens moet ons na ’n hoër rat oorskakel om by die inwerkingstelling daarvan te kom.”
Mnr. S.K. Makinana, ondervoorsitter van die Nasionale Wolkwekersvereniging, het voorgestel Agri SA moet weer sterk standpunt inneem teen die wysiging van artikel 25 van die Grondwet.