LANDBOU VERWELKOM ‘STANDVASTIGE’ MBOWENI
MNR. Tito Mboweni, voormalige president van die Reserwebank, se aanstelling as die nuwe Minister van Finansies is in landbougeledere gunstig ontvang.
Pres. Cyril Ramaphosa het sy aanstelling Woensdag aangekondig nadat mnr. Nhlanhla Nene bedank het weens sy vergaderings met die Guptafamilie.
Mnr. Wandile Sihlobo, ekonoom by die landbousakeka mer Agbiz, sê Mboweni is standvastig, het goeie ervaring in die maak van ekonomiese beleid en bring ’n magdom kennis en ervaring wat stabiliteit, fokus en die waardigheid van die Nasionale Tesourie sal verseker.
Mnr. Omri van Zyl, uitvoerende direkteur van Agri SA, het namens die organisasie Mboweni se aanstelling verwelkom. “Hy is ’n avokadoboer in Limpopo wat die landbou verstaan. Hy was ook nou ’n tyd lank in die private sektor betrokke en het ’n goeie begrip van wat nodig is om die ekonomie reg te ruk.”
Mnr. Bennie van Zyl, hoofbestuurder van TLU SA, het gesê nie net Mboweni nie, maar die hele Kabinet sal ’n rol moet speel om die land op ’n gesonde ekonomiese voet te kry. Hy meen dis moeilik om kommentaar te lewer, aangesien die ANC nou wipplank ry in die soeke na ’n uitkoms vir homself met ’n verkiesing om die draai.
Mboweni besit ’n klein stukkie grond op die berg naby Magoe baskloof in Limpopo waar hy ’n gerespekteerde en gewaardeerde lid van die Haenertsburggemeenskap is.
“Dít is die plek waarheen hy kom om weg te kom van die gewoel. Hoewel hy welbekend in Haenertsburg en redelik betrokke by die gemeenskap is, is hy eintlik ’n stil ou wat lief is om by die Magoebaskloofhotel ontbyt te eet en sal soms daar ’n skemerkelkie geniet,” sê mnr. Howard Blight van die Amorentiakwekery by Tzaneen.