Reëls oor CEM effens verslap
’N BELANGRIKE toegewing vir perdeeienaars is gemaak in die onlangse hersiening van maatreëls om voorvalle van aansteeklike perdebaarmoederinfeksie (beter bekend as CEM) te monitor.
Daarvolgens moet die verpligte gereelde toets van alle hingste wat vir natuurlike dekking gebruik word, slegs elke vyf jaar gedoen word, pleks van die huidige twee jaar.
Dit beteken waar CEMtoetse in die jongste vyf jaar geskied het en die hings(te) negatief vir dié infeksie getoets is, word die terughou van registrasie opgehef
van hierdie hingste se vullens wat tans aan toetse onderhewig is.
Dr. Mpho Maja, direkteur van dieregesondheid by die Departement van Landbou, Bosbou en Visserye, sê in ’n verklaring oor die hersiening van die maatreëls die toets van hingste vir KI (semenskenkers) moet steeds jaarliks gedoen word. Ingevoerde semen is ook aan dié maatreëls onderworpe.
Dié maatreëls is ook van toepassing op hingste wat ingevoer word. Hulle moet dus ook CEMvry getoets word voor die eerste registrasies gedoen kan word.
DUUR BEHANDELING
Die hoogs aansteeklike perdebaarmoederinfeksie word veroorsaak deur die bakterie Taylorella equigenitalis en veroorsaak onvrugbaarheid by besmette merries. Dit is duur om te behandel en het boonop ’n beperkende impak op teelprogramme.
Aangesien dié infeksie deur die Wêrelddieregesondheidsorganisasie aanmeldbaar verklaar is, kan besmetting in ’n land ook sy perdeuitvoer strem. Baie lande pas invoerbeheermaatreëls toe om dit te bekamp.
Sedert CEM in 2011 die eerste keer in SuidAfrika voorgekom het, is monitering streng in die land toegepas. ’n Enkele geval verlede jaar het tot gevolg gehad dat die hersiening van die maatreëls daarteen uitgestel moes word. Daar is bevind dit was beperk tot die perde betrokke by die eerste uitbreking in 2011.