Nuwe Vigus bied meer waarde vir geld
Die nuwe JMC Vigus is besig om die twyfel wat daar oor Chinese voertuig vervaardigers bestaan ,’ n nekslag toet e dien.
Met die koms van die Chinese voertuig vervaardigers na die Suid-Afrikaanse mark was daar ’n geruime tyd ’n huiwering onder kopers om uit die Japannese skaduwee te beweeg.
“Aikona,” het hulle gesê, “wys ons eers die gehalte.”
En aanvanklik het gehalte ’n aantal Chinese modelle op die h i per mededingende Suid-Afrikaanse bakkie mark laat struikel.
Dit is egter iets van die verlede sedert nuwe bakkiemodelle op die toneel verskyn het. Een van dié vervaardigers is die Jiangling Motor Company (JMC), wat met sy nuwe Vigus-bakkie ’n bekostigbare, betroubare model aanbied.
Die Vigus is weliswaar nog nie mededinging vir die groot verkopers op die bakkiemark nie, maar het ál die nodige bykomstighede wat van ’n bakkie verwag word, sonder dat jy noodwendig ’n tweede verband op jou plaaslening sal moet uitneem om een te besit.
BAIE ONDER DIE ENJINKAP
Eerstens het die dieselmodelVigus ’n 2,4 liter TDCI-Fordenjin wat seker maak hy kan heel gemaklik by die snelheidsperk hou. Die petrolweergawe volg die bekende gebruik om ’n Mitsubishi-enjin te gebruik – in hierdie geval die Mitsubishi 4G69 MPI.
Ondanks die bakkie se krag- van 88 kW en 95 N.m wringkrag het hy tyd nodig op spoed te kom. Dit is nie ’n bokspringbakkie nie, maar eerder ’n rustiger trekperd wat baie mooi loop wanneer hy eers sy ore platgetrek het.
Die bakkie is mooi stil op die pad en enjingeraas is tot die minimum beperk. Rygemak is beslis een van die bakkie se hoofaantreklikhede, met die sitplekke wat jou nie gaan moeg maak as jy ver moet ry nie. Die dubbelkajuit is lekker ruim met genoeg sitplek vir ’n gesin van vyf om gemaklik te kan rondrits.
PRAKTIES BINNE
Hoewel die Vigus ongetwyfeld ’n aantreklike voertuig van buite is, is dit veral sy binne-afwerking wat beïndruk. Die afwerking is nie luuks nie, maar prakties. Die bakkie is egter toegerus met dieselfde toebehore as wat jy in van sy (duurder) mededingers sou verwag. Leersitplekke, ’n 6,5 duim-raakskerm met USB, DVD en AUX, en die multi-funksionele stuurwiel skakel alles netjies by mekaar in.
Die enigste element wat kortkom, is Bluetooth. Andersins is die Vigus ’n stewige mededinger.
Chinese voertuigvervaardigers het beslis ’n lang pad gestap om tot by vandag se bakkies van ’n hoë(r) gehalte uit te kom. Een van die faktore waaraan geskaaf is, is die veiligheid van die bestuurder én die passassier. Die Vigus het sluitweerremme (ABS) met remkragverdeling (EBD) en bestuurder- en passasierslugsakke in die SLX-model. Parkeersensors is ook agter aan die bakkie aangebring.
Met ’n grondvryhoogte van 225 cm is die Vigus net mooi hoog genoeg om ’n draai in die veld te maak om ’n wegloopkalf te gaan soek of om moeilike plekke in jou kampe te bereik. Die veelterreinbande saam met die bakkie se sterk wringkrag bied ’n pakket wat gladde, sanderige of modderige toestande met gemak sal kan baasraak. ’n Knoppie, netjies onder die rathefboom aangebring, laat die bakkie toe om in die ry te verwissel tussen tweewiel-, vierwiel- en laestrek-vierlewering wielaandrywing. Hoewel die laestrek-vierwielaandrywing nie dieselfde trekkrag bied as dié van duurder mededingers nie, bied die JMC Vigus ’n gemaklike, betroubare ry-ervaring.
Dit is ’n bakkie wat goed behoort te presteer in die bobasiese mark, maar gaan nie die groot verkopers in die nag laat rondrol nie.
Die Vigus SLX (dubbelkajuit, 4x4, diesel) verhandel teen R379 880 en die LX (4x4, petrol) teen R282 880.
Die bakkies het ’n diensplan van vyf jaar of 60 000 km en ’n waarborg van vyf jaar of 100 000 km.
NAVRAE: JMC SA, tel. 011 668 0300.
BOERVROU RY 20 000 KM TEEN R1 600!
Met brandstof wat aansienlik duurder word, begin talle voertuigeienaars dink aan maniere om hul vervoeruitgawes beter te bestuur. Die beste antwoord is natuurlik ’n voertuig wat nie op vloeibare brandstof loop nie, maar met sonkrag of selfs jou plaas se kragtoevoer herlaai.
Die gebrek aan elektries aangedrewe bakkies is ’n hindernis vir boere wat hulself van die kettings van vloeibare brandstof wil ontknoop. ’n Nederlandse maatskappy doen wel batteryombouings vir die Toyota Land Cruiser 70-bakkie, maar dié veranderinge is hoofsaaklik gemik op die mynbedryf, en dit is boonop duur.
Elektriese gesinsmotors is wel beskikbaar. As “afstand-angs” jou keer om ’n batteryvoertuig as jou huishouding se “dorpskar” aan te skaf, is me. Sylvia Wilson se storie dalk die lees werd.
Dié 70-jarige Australiese boervrou van Biloela het onlangs om haar tuisland gery. Enige Australiër kan jou vertel dit is ’n roete van meer as 20 000 km met min dorpe langs die pad.
Groot dele van die roete is boonop grondpad.
Australië is ’n ewebeeld van Suid-Afrika as dit kom by kwessies rakende elektriese voertuie: Daar is oorgenoeg uitstraling vir sonkrag, maar reuse-afstande tussen nedersettings, hoë dagtemperature en strawwe padtoestande skep probleme. Wilson se redenasie was eenvoudig dat enige gebou waar daar ’n lig brand of slimfoon herlaai kon word, ook haar Tesla Model S vol energie kon maak.
Ná 110 dae het Wilson haar reis van 20 396 km voltooi. Sy het nie een keer langs die pad gaan staan met ’n pap battery nie.
Dit was juis Wilson se oorlede man, Rod, wat spottenderwys gesê het dat dit eenvoudiger en haalbaarder is om met ’n elektriese voertuig deur Australië te toer omdat jy in staat sal wees om te herlaai waar daar ook al ’n lig brand. In dele van Australië se diep platteland is loodvrye petrol eenvoudig nie beskikbaar nie, maar daar is wel elektrisiteit.
HERLAAIPUNTE IN SA
Altesaam 86 herlaaipunte is in Australië aangebring.
In Suid-Afrika het Jaguar pas aangekondig dat hy 82 herlaaipunte gaan oprig om reise tussen die binneland en die kus moontlik te maak vir plaaslike eienaars van elektriese voertuie. Dit gaan die bekendstelling van sy I-Paceelektriese sportsnutsvoertuig vroeg volgende jaar vooraf.
Jaguar se herlaaipunte sal op die gewildste roetes, soos die N3 tussen Gauteng en Durban en die N1 tussen Gauteng en Kaapstad, wees.
As meer vervaardigers Jaguar se voorbeeld volg, sal dit spoedig moontlik wees om veel goedkoper die lang afstande in Suid-Afrika af te lê.