Boerekos 13 is hier! Uit die afdeling: BAK VIR KERSTYD
In ons splinternuwe someruitgawe is daar hope inspirasie vir aandete, Kersfeeskos, somerpoeding, die lekkerste gebak en meer.
Uit die afdeling: ’N FEES VAN VRUGTE Kersie-en-vanieljekonfyt
Laat die lekkerte van die kort kersieseisoen langer hou met hierdie konfyt. Eksperimenteer ook met ander speserye, soos kaneel en steranys.
2 kg kersies, gehalveer en ontpit
1,75 kg witsuiker
125 ml water Sap van ’n halwe suurlemoen
1 vanieljepeul, in die lengte gehalveer en saadjies uitgeskraap
Sit die kersies in ’n groot kastrol en voeg die suiker, water, suurlemoensap en vanieljesaadjies en -peul by. Roer, sonder om te verhit, tot die suiker begin oplos. Verhit dan die mengsel oor lae hitte, terwyl jy aanhoudend roer, tot die suiker heeltemal opgelos is. Verhit tot kookpunt en kook vinnig tot die kersies sag en die stroop net onder setpunt is. (Roer nou en dan om te keer dat die konfyt brand.) Laat afkoel en skep in warm, gesteriliseerde flesse. Verseël dadelik. Lewer ongeveer 800 ml konfyt.
Uit die afdeling: KONINGSKOS OOR DIE KOLE Hoender-en-soetpatatpot
Hierdie geurige potjie het ’n eksotiese kerriesmakie danksy ’n stukkie vars gemmer, speserye en klapperroom. Dit is heerlik en sommer lekker vinnig gaar. Ek het dieselfde resep al met lamskenkels gemaak, en dit is net so lekker. Jy moet net seker maak dat daar deurgaans genoeg vloeistof in die pot is.
45 ml olie
8-10 hoenderstukke Sout en vars gemaalde swartpeper
2 uie, gekap
4 knoffelhuisies, gekap
10 ml gerasperde, vars gemmer
10 ml garam masala
3 ml elk fyn kaneel en komyn Sap van
1 groot suurlemoen
1 blik (440 g) klapperroom Water
2 groot soetpatats, geskrop en in skywe gesny Heuning (opsioneel) Vars tiemietakkies, om af te rond
Verhit die olie in ’n plat swartpot wat jy op ’n driepootstaander op warm kole staanmaak. Geur die hoenderstukke met sout en peper en braai dit in die olie tot goudbruin. Skep uit en hou eenkant. Braai die uie, knoffel, gemmer en speserye in dieselfde pot tot die uie sag is. Skep die hoender terug en voeg die suurlemoensap en klapperroom by. Maak die klapperroomblik vol water en voeg dit ook by. Roer liggies, sit die pot se deksel op en krap ’n paar kole onder die pot uit sodat die pot net stadig prut. Laat prut vir 1 uur. Haal dan die deksel af en pak die patats op die hoender. (Voeg ’n bietjie water by as die vloeistof min lyk.) Sit weer die deksel op, krap ’n paar kole onder die pot in en laat prut die pot vir nog 30-40 minute tot die patats lekker sag en die sous ryk en romerig is. Geur na smaak met sout, peper en dalk ’n druppel heuning. Rond met ’n paar takkies jong tiemie en sit voor op rys of koeskoes. Lewer 6-8 porsies.
Luukse vrugtebroodjie
Dié broodjie bestaan eintlik net uit vrugte en neute met ’n bietjie beslag om alles te bind. Jy kan rondspeel met die verskeidenheid vrugte wat jy wil gebruik. Versuikerde vrugte lyk ook mooi en smaak lekker. Maak net seker dat
jy hou by 500 g vrugte en 300 g neute.
300 g gemengde neute
200 g dadels, gekap
100 g gesnipperde groenvyekonfyt
200 g rooi glanskersies Gerasperde skil van
1 suurlemoen
150 ml koekmeelblom
3 ml bakpoeier
3 ml sout
150 ml suiker
2 eiers
5 ml vanieljegeursel
60 ml brandewyn
Voorverhit die oond tot 150 °C en smeer ’n losboomkoekpan van 20 cm met botter. Voer uit met ’n dubbele laag bakpapier (ook teen die kante) en smeer weer. Meng die neute, dadels, gesnipperde groenvye, kersies en suurlemoenskil in ’n mengbak. Sif die meel, bakpoeier en sout oor die vrugte, voeg die suiker by en meng goed tot alles met ’n meellagie bedek is. Klits die eiers en vanieljegeursel saam en voeg by. Meng goed. Skep in die voorbereide pan en maak gelyk. Bak vir 2 uur of tot ’n toetspen skoon uitkom. Laat heeltemal in die pan afkoel en keer uit. Giet die brandewyn oor en hou dig toegedraai in ’n lugdigte houer. Giet elke week ’n sopie brandewyn oor tot voor Kersfees. Lewer 1 middelslagkoek.