DIE ANDER SÊ
DIE Suid-Afrikaanse Inkomstediens is besig om werk te maak van die Belastingombud se bevinding oor die terugbetalings van dieselrabatte en BTW, het mnr. Mark Kingon, waarnemende kommissaris van die Inkomstediens, verlede week gesê tydens die parlementêre bespreking van die organisasie se jaarverslag. Tot dusver is tien sake afgehandel, en ’n nuwe stelsel wat die probleme met die opskorting van terugbetalings sal beëindig, word tans in werking gestel. Verder sal die rekeninge vir die terugbetaling van BTW en diesel geskei word.
“Ons kan nie flaters by die SAID bekostig nie,” het hy gesê. “Ons beweeg in die regte rigting, maar ons gaan onstuimige tye binne.”
Daar was verskeie kwelpunte in die organisasie se finansiële verslae – merietebonusse is sonder die Minister van Finansies se goedkeuring betaal. Onreëlmatige uitgawes, wat met bonusse verband hou, beloop R4,3 miljoen. Die SAID het ook onreëlmatige uitgawes op twee kontrakhernuwings ten bedrae van R104 miljoen aangegaan omdat dit nie die Nasionale Tesourie se nuwe reëls betyds in werking begin stel het nie.
Toe parlementariërs Kingon vra om dié uitgawes te verduidelik, het hy dit manhaftig beantwoord, al was hy nie die kommissaris ten tyde van die problematiese uitgawes nie. “Ons het misluk. Ons kan nie onkunde pleit nie.” Hy het gesê hoewel daar kommer is oor die toestand van die organisasie se inligtingstegnologiestelsel, is dié aspek wanvoorgestel in die media; die stelsel gaan nié ineenstort nie.