SAGTEVRUGTEBEDRYF SLAAN SLAG VIR BEMAGTIGING
’N NUWE finansieringskema vir ontluikende boere in die sagtevrugtebedryf is verlede week in die Paarl bekend gestel.
Die Land Bank, die plaaslike sagtevrugtebedyf en die Tesourie se Jobs Fund het hande gevat om Hortfin, die eerste “gemengde finansieringskema” vir dié bedryf, bekend te stel.
Pres. Cyril Ramaphosa het verlede maand in sy ekonomiese herstelplan na dié soort platform verwys waar die Land Bank saam met nog ’n instelling finansiering opkomende boere teen ’n laer rentekoers moontlik maak.
Hortfin, wat gemik is op mense of ondernemings waarvan 51% in swart besit is, is spesifiek vir die sagtevrugtebedryf ingestel.
Omdat dié uitvoersektor aan streng internasionale standaarde moet voldoen en produksiekoste dus relatief hoog is, vind swart entrepreneurs dit moeilik om hier ’n vastrapplek te kry, sê me. Najwah Allie Edries, hoof van die Jobs Fund.
“Deur ’n innoverende finansie- ringsmodel beskikbaar te stel, sal hierdie vennootskap ’n aansienlike bydrae tot die transformasie van die bedryf lewer,” sê sy.
WAT BEHELS PROJEK?
Na gelang van die aansoekers se risikoprofiel, kan hulle lenings teen ’n gunstige rentekoers van prima minus 2% tot prima plus 1% bekom. Die lenings se grootte sal wissel van R2,5 miljoen tot R25 miljoen. Deelnemende bedrywe sluit in die sagte- en steenvrugtebedryf en die SuidAfrikaanse Tafeldruifbedryf (Sati).
“Sati is opgewonde om deel van die Hortfin-projek te wees wat ons visie van ’n progressiewe, gelykwaardige en volhoubare tafeldruifbedryf sal help realiseer,” sê mnr. Willem Bestbier, uitvoerende hoof van Sati. Die projek behels benewens finansiële steun ook omvattende steun ten opsigte van tegniese en bestuursaspekte aan die leninghouers.
Leninghouers word ook aangemoedig om saam met ander finansiers, landbou-organisasies en landbou-ondernemings te werk.