‘DEEL KENNIS OF KRY ’N ONAANGENAME VERRASSING’

TENSY mense in Suider-Afrika die bereidwilligheid ontwikkel om te deel – nie noodwendig grond nie, maar ook kennis, vaardighede en ervaring – kan hulle ’n onaangename verrassing te wagte wees.

Mnr. Ryno van der Merwe, voorsitter van die Namibiese Landbou-unie (NLU), het op verlede week se Aldam-veeskool by Ventersburg gesê lede van sy organisasie het besluit om by grondhervorming betrokke te wees.

“Ons leef en produseer in ’n dinamiese, veranderende omgewing. Ons skep egter soms ons eie sienings wat nie op feite gegrond is nie en let soms op aspekte waaraan ons niks kan doen nie.”

Veranderinge veroorsaak onsekerhede. ’n Mens kan maklik só verlore raak in jou eie sienings dat dit lyk of daar geen hoop is nie. Sodoende verwoes mense hul drome.

Die belangrikste veranderings is op maatskaplik-ekonomiese vlak. Die politieke omgewing het verander om onregverdighede van die verlede te verander.

Die prosesse is nie noodwendig reg of verkeerd nie, maar gaan oor politieke aspirasies teenoor ekonomiese werklikhede. Die knelpunt is om ’n balans tussen die twee te vind.

’N WERKLIKHEID

Van der Merwe het gesê die landbou en grondhervorming is deel van die politieke veranderinge.

“As jy sê dit is nie die waarheid nie, gaan jy ’n groot verrassing kry. Wil ek die regering ignoreer of ingesluit word in die toekoms? Vra en beantwoord dié vraag vroeg, anders sal die regering besluite namens boere neem,” het hy gesê. Dit verg ’n keuse, naamlik links of regs. Daar is niks tussenin nie. “Wil jy jou eie slagoffer wees of gaan jy die werklikhede erken? Gaan jy ander mense die skuld gee of verantwoordelikheid aanvaar? Dit is skrikwekkend hoe sommige mense ander mense blameer pleks van om self die werklikhede te aanvaar. As jy die uitslag wil verander, verander jou benadering, nie jou doelwit nie,” het Van der Merwe gesê.