Groot beleggings, maar ook groot probleme vir SA se boere
BELEGGINGS in die Suid-Afrikaanse landbou het sedert 2005 van R38 miljard tot R73 miljard gegroei, waarvan die meeste uit Europa en Amerika kom.
Só het mnr. Reghardt Strauss van Standard Bank Agribesigheid op Agri-Expo Livestock se vleisbees-inligtingsdag gesê.
Skuld het egter in 2015-’16 met 9% gegroei. Wat die situasie verder bemoeilik, is dat die markwaarde van grond hoër is as wat ’n boer met landbouproduksie daaruit kan verdien.
Die grootste probleem vir die landbou wêreldwyd is dat meer voedsel in die volgende 50 jaar geproduseer sal moet word vir die groeiende wêreldbevolking as
in die vorige 500 jaar tesame. Dit moet ook ekonomies en bekostigbaar gedoen kan word.
’n Plaaslike probleem waarby die landbou betrek word, is werkloosheid. Laer werkverskaffing in die landbou is moontlik weens presisieboerdery wat ál meer toegepas word. Voorts raak arbeid ’n duur aspek vir boere. Rasse-ongelykheid bestaan steeds. Sowat 14,3 miljoen mense in die land het nie altyd geredelike toegang tot voedsel nie.
Water bly ’n probleem. Suid- Afrika se gemiddelde reënval is 50% van die wêreldgemiddelde, maar die gemiddelde verbruik van water per persoon is 26% hoër. Daarom sal die landbou water ál meer produktief moet gebruik, soos om kultivars te plant wat minder water benodig.
“Die landbou moet sy mededingende voorsprong behou deur spanwerk, goeie waardes, aanpasbaarheid, goeie sakemodelle en uitstekende bestuur,” het Strauss gesê.