SKAAPSKEMA KNOU NAMIBIESE KUDDE
NAMIBIESE skaapboere is raadop oor die invoerbeperkings op lewende skape na Suid-Afrika, wat die land se skaapkudde sedert 2002 met amper die helfte laat krimp het.
Kragtens die kleinveebemarkingskema moet boere een skaap plaaslik laat slag vir elke lewende slaglam wat uitgevoer mag word. Voorheen was dit ses plaaslik geslagte diere vir een uitgevoerde lam, maar dit is intussen verslap.
Op die onlangse jaarkongres van die Lewendehaweprodusente-organisasie (LPO) in Windhoek het boere gesê die nasionale skaapkudde het sedert die instelling van die skema van 1,3 miljoen tot 700 000 gekrimp. Hulle kan nie langer so aangaan nie en is bereid om hof toe te gaan.
Adv. John Walters, die Namibiese ombudsman, het op die kongres gesê hy het by die staat aanbeveel dat die skema geskrap word en oor die volgende drie jaar geëvalueer word om die impak te bepaal.
“As die minister nie gehoor gee nie, is daar net een alternatief en dit is dat ons die regering hof toe neem, wat ’n duur proses sal wees.”
ANTWOORD
Die minister van landbou, mnr. Alpheus !Naruseb, het Walters kort ná die kongres ingelig dat hy nie die afskaffing van die skaapbemarkingskema kan goedkeur nie omdat daar volgens hom geen bewys is dat die verswakking van die skaapbedryf aan die skema toegeskryf kan word nie.
!Naruseb is nou besig om konsultante aan te stel om verdere ondersoek te doen. Hy onderneem om dit binne drie maande af te handel en sal die Namibiese Landbou-unie oor die uitslag inlig.
“Vir my as klein skaapboer maak dit nie sin dat daar in ’n vrye Namibië plek vir so ’n skema is wat boere verbied om hul vee te verkoop aan wie hulle wil nie,” het Walters gesê.
Hy onderneem om te volhard met onderhandelinge, en sê hy sal hof toe gaan as sy aanbevelings nie aanvaar word nie.