Parlement se ‘wit hemde’ bewaak korrupsiegeheime
DIE parlement se omstrede veiligheidspersoneel, die “withemde”, is verlede week ingeroep om seker te maak geen medialede is teenwoordig by die Spesiale Ondersoekeenheid, Valke en Nasionale Vervolgingsgesag se voorlegging oor bestaande en nuwe ondersoeke na ongerymdhede in die Departement van Water en Sanitasie nie.
Al drie dié liggame het aanbeveel dat die vergadering agter geslote deure moet plaasvind omdat individue se name genoem sal word, en weens die sensitiewe aard van die inligting.
Luidens die departement se jongste jaarverslag het sy opgehoopte, onreëlmatige uitgawes vir die jaar tot 31 Maart 2018 R6,1 miljard beloop. Dié uitgawes, wat reeds ondersoek word, strek van onreëlmatighede met tender-toekennings tot die aankoop van infrastruktuur.
Pres. Cyril Ramaphosa het in September vanjaar ’n verdere proklamasie bekragtig wat die Spesiale Ondersoekeenheid
toelaat om beweerde ernstige wanadministrasie en onwettige besteding van openbare geld in die aanskaffing of kontraktering van IT-dienste van die sagtewaremaatskappy SAP te ondersoek.
DUBBELE FAKTURE
City Press het vroeër vanjaar berig dat honderde duisende mense in Giyani, Limpopo en aanliggende dorpies sonder water is omdat SAP twee keer fakture vir dieselfde werk by die departement ingedien het wat honderde miljoene beloop het.
Me. Nomvula Mokonyane, die voormalige Minister van Water en Sanitasie, het in 2016 die kontrak met SAP goedgekeur, wat sagteware-lisensies aan ál
nege waterrade en die Trans-Caledon-Tonnelowerheid verskaf het.
Die portefeuljekomitee vir water en sanitasie het einde verlede jaar sy frustrasie uitgespreek oor ondersoeke nie afgehandel word nie, en geen amptenare dissiplinêr verhoor word nie. Die komitee het toe gesê dis onaanvaarbaar dat werknemers van die departement voortgaan om staatsgeld te plunder sonder gevolge.
Die komitee het gevra vir ’n volledige verslag oor ’n proklamasie wat uit 2012 dateer.
Dit is onbekend waarom mnr. Lulu Johnson, voorsitter van die portefeuljekomitee, die “withemde” ontbied het om die media te verwyder.