REUSE-KONINGSKANDELAAR BEKOOR NAMPO KAAP

’n Reuse-kandelaar wat uit 300 koningskandelaarblomme bestaan, het menige besoeker aan die eerste Nampo Kaap op Bredasdorp bekoor. Me. Marjolijn Malan, organiseerder van die Overbergse inheemse flora-uitstalling in die BKB-saal op Nampo Kaap, sê dié reuse-koningskandelaar is die grootste in sy soort ter wêreld. “Dit is die meeste koningskandelaarblomme wat nóg ter wêreld in een uitstalling gebruik is.”

Die bestuur van Nampo Kaap het Malan, wat onder meer ’n lid van die Wes-Kaap se blomme-vereniging is, genader om ’n unieke uitstalling van inheemse flora saam te stel. Mnr. Dirk Giliomee, ’n plaaslike boer, het haar met die uitstalling bygestaan.

Sy het die droë koningskandelaarblomme, wat net van Februarie tot April blom, in die veld bymekaar gemaak. “Ek het besluit om reg om die kandelaar verskillende blommerangskikkings te maak van tonele wat eg aan die Overberg is. Die rangskikkings is gekombineer met swart-wit foto’s van natuurtonele uit die spesifieke streke van die Overberg waar die blomme voorkom.”

Mnr. Toit Wessels, assistentbestuurder van bemarking en Nampo by Graan SA, sê hulle beoog om dié uitstalling by Nampo Kaap in 2019 selfs groter te maak. “Die droogte het ’n impak op die natuurlike flora gehad, maar ons hoop dat dié uitstalling volgende jaar nóg groter sal wees.”

FOTO: VERSKAF Rome is nie in ’n dag gebou nie . . . Ook nie die grootste koningskandelaar ter wêreld wat op die afgelope Nampo Kaap te sien was nie. Me. Marjolijn Malan het maande lank kandelaarblomme bymekaar gemaak, terwyl die boer mnr. Dirk Giliomee ’n struktuur gesweis het waaraan die droë blomme geheg kon word. Hulle het vier dae lank by Bredasdorppark aan die uitstalling gebou.