Wat eet ons vanaand?
Hierdie week lê ons weg aan aandetes uit ons splinternuwe someruitgawe van Landbou Boerekos, wat nou op winkelrakke is.
Boerewors- en groentekasserol
30 ml elk olie en botter 500 g boerewors 1 groot eiervrug, in blokkies gesny en met sout besprinkel 4 murgpampoentjies, in blokkies gesny 1 rooi en 1 geel soetrissie, ontpit en in blokkies gesny 1 ui, gekap 3 knoffelhuisies, gekap 1 blik (410 g) gekapte tamaties Halwe tamatieblik vol water Sout, peper en ’n knippie suiker na smaak Gekapte, vars pietersielie, om af te rond
Verhit die olie en botter in ’n diep swaarboompan. Druk die worsvleis uit die worsderms en braai die vleis in die olie tot gaar. Breek die stukkies worsvleis met ’n houtlepel op terwyl dit gebraai word. Spoel die eiervrug onder koue water af en druk goed droog. Voeg die saam met die murgpampoentjieblokkies, soetrissieblokkies, ui en knoffel by die worsvleis. Braai vir ongeveer 10 minute, tot gaar. Voeg die tamaties, geurmiddels en pietersielie na smaak by. Prut liggies vir nog 7 minute. Sit voor op rys of koeskoes. Lewer 4-5 porsies.
Forel met knoffel, heuning en sojasous
Forel wat só gaargemaak is, kan jy warm of koud voorsit.
6 forelfilette, met vel 125 ml sojasous 3 knoffelhuisies, baie fyn gekap 60 ml heuning Vars gemaalde swartpeper na smaak
Voorverhit die oond tot 200 °C. Voer een of twee bakplate met foelie uit en pak die forelfilette (met die velkant na onder) daarop. Meng die sojasous, knoffel, heuning en swartpeper goed saam tot dit ’n gladde sous is. (Jy kan dit effens verhit in die mikrogolf as die heuning moeilik meng.) Skep die sous egalig oor elke visfilet. Oondrooster vir sowat 7 minute (na gelang van die grootte en dikte van die filette) tot die vis net gaar is en maklik vlok. Laat ’n paar minute afkoel en sit voor. Lewer 6 porsies.
Lintnoedels met frikkadelle in tamatiesous en basiliepesto
Die somer is die ideale tyd om vars kruie in jou kos te gebruik. Sagte, sappige basiliekruidblare maak heerlike pesto en gee die lekkerste vars geurinspuiting aan hierdie pastagereg.Eksperimenteerookmetander kruie vir pesto. Roket, koljander en selfs pietersielie werk goed.
Basiliepesto
(sien metode hiernaas)
Frikkadelle
500 g beesmaalvleis 1 ui, gerasper 2 knoffelhuisies, fyn gekap 7 ml fyngerasperde suurlemoenskil 10 ml fyngekapte pietersielie 3 ml elk sout, swartpeper, komyn en gemaalde koljander
Tamatiesous
1 ui, gekap 2 knoffelhuisies, fyn gekap 15 ml olie 15 ml tamatiepasta 1 blik (410 g) gekapte tamaties 125 ml water Sout, swartpeper en suiker na smaak
500 g lintnoedels Parmesaanskaafsels en roketblare, om af te rond
Pesto: Blansjeer 500 ml vars basiliekruidblare vinnig in kookwater. Dreineer en kap grof. Verwerk die basilie met 125 ml olie, 2 knoffelhuisies, 125 ml gemengde neute, 5 ml seesout, 2 ml swartpeper, 80 ml suurlemoensap en 125 ml fyngerasperde harde kaas (soos parmesaan of gruyère) tot ’n romerige puree vorm. Proe en geur na smaak. Lewer 250 ml pesto. Frikkadelle: Meng ál die bestanddele goed saam en vorm in ewe groot hapgrootte bolletjies. Hou eenkant.
Tamatiesous: Braai die ui en knoffel in die olie tot sag. Voeg die tamatiepasta by en braai vir ’n paar sekondes. Voeg die gekapte tamaties, water, sout, peper en suiker by en verhit tot kookpunt. Prut vir 5 minute. Skep die frikkadelle in die tamatiesous en prut vir 15 minute tot gaar. Terwyl die frikkadelle prut, kook die pasta vinnig in ’n groot pot vinnig kokende soutwater tot netnet gaar en steeds ferm. Dreineer die pasta
en skep die frikkadelle in tamatiesous oor. Skep ’n paar lepels pesto oor en rond af met parmesaanskaafsels en jong roketblare. Sit dadelik voor. Lewer 6-8 porsies.
Spinasie-en-eierrol
200 g gaar spinasie, baie fyn gekap 60 ml koekmeel 5 ml bakpoeier 15 ml fyngekapte grasuie Sout en vars gemaalde swartpeper 4 ekstragroot eiers, geskei
Vulsel
1 ryp avokado, goed fyngedruk 60 ml gladde maaskaas 10 ml fyngekapte grasuie Sout, vars gemaalde swartpeper en vars suurlemoensap na smaak
Voorverhit die oond tot 180 °C. Spuit ’n bakplaat van 33 cm x 23 cm met kleefwerende kossproei en voer uit met bakpapier. Meng die fyngekapte spinasie, meel, bakpoeier, grasuie, sout, peper en eiergele en verwerk tot glad. Klits die eierwitte in ’n skoon bak tot stywe punte vorm. Vou die eierwit by die spinasiemengsel in. Keer die spinasiemengsel op die voorbereide bakplaat uit en smeer versigtig gelyk. Bak vir 12-15 minute tot opgepof, goudbruin en redelik ferm. Keer die bakplaat versigtig op ’n skoon teedoek om en lig die bakplaat af. Trek die bakpapier versigtig af en rol die spinasiegebak in die teedoek op. Laat dit vir 10 minute afkoel en rol dan weer oop. Terwyl die rol afkoel, maak die vulsel. Meng die fyngedrukte avokado en gladde maaskaas goed saam. Voeg die grasuie by en geur na smaak met sout, peper en vars suurlemoensap. Rol die spinasierol versigtig oop, smeer met ’n egalige laag van die vulsel en rol weer toe. Sny in skywe en sit voor met slaaie van jou keuse. As jy wil, kan jy die rol ook saam met koue vleis, hoender of vis voorsit. Lewer 6 porsies.