SA EEN ‘GIFTIGE SAMPIOEN’ WEG VAN SUKSES OF INEENSTORTING
“SUID-AFRIKA is slegs één giftige sampioen weg van óf ’n goeie regering, óf van totale ineenstorting ná die 2019-verkiesing. Laat ons hoop pres. Cyril Ramaphosa het goeie dokters wat hom kan red van die giftige sampioen. Dit plaas die land op ’n naaldpunt.”
Só het mnr. Christo van Rheede, adjunk- uitvoerende direkteur van Agri SA, op ’n tegniese inligtingsdag naby Robertson gesê. Die dag is deur die Inmaakvrugte-produsentevereniging en Droëvrugte Tegniese Dienste (DTD) aangebied.
“Stel jou ’n land voor met mnr. David Mabuza as president, me. Nkosazana (Dlamini-)Zuma as adjunkpresident, mnr. Ace Magashule in Luthuli-huis en die premier van Noordwes as sy adjunk!”
Tog moet boere nie toelaat dat hul emosies met hulle op loop gaan nie, want as Suid-Afrika sy boere verloor, plof die land in en dit kan nie bekostig word nie.
Van Rheede het na die Eenheidsforum vir die Landbou (Asuf) se onlangse gesprekke verwys. Agri SA, Afasa, Nafu SA en TLU SA was daarby betrokke.
“Ek is baie meer optimisties ná die gesprek en ek glo dat dit die landbou in Suid-Afrika na nuwe hoogtes kan voer.
“Ons is besig om die ware boere van die land bymekaar te trek in die proses. Ongelukkig sit ons net met ’n onbeholpe burokrasie wat nie behoorlik uitvoering kan gee aan die President se opdragte nie.”
Agri SA steek ’n baie duidelike hand uit na die Regering. “Daar is 100 000 swart boere wat deur die verskillende affiliasies van Agri SA funksioneer. Daar is 10 000 swart boere wat wol uitvoer na China en uitstekende pryse behaal en 10 000 swart graanboere wat uitstekend saam met Agri SAaffiliasies funksioneer.
“Agri SA hanteer die politieke
aspekte, maar onderhandel nie oor grondonteiening sonder vergoeding nie. Ons praat oor praktiese planne wat uitvoerbaar is, want dit is die enigste manier om die saak van die boer te stel, al kry ons baie kritiek.” ’n Mentaliteit van wit teen swart kan nie bekostig word nie, “want ons wíl hê alle boere moet hul volle potensiaal bereik”. ’n Wen-wen-situasie deur vennootskappe is haalbaar.
Van der Rheede het ’n beroep gedoen dat politieke partye hulle op die ware probleme in die land moet toespits – werkloosheid, armoede, sekerheid, kragprobleme, verblyf, water en onderwys, pleks van om van grond ’n politieke speelbal te maak.
—