BRAHMANE IN NAMIBIË VERDUBBEL
Die getal Brahmane in Namibië het in die afgelope tien jaar verdubbel. Dit staan nou op 20 000 geregistreerde diere, terwyl die getal telers ná die droogte op sowat 120 gestabiliseer het.
Mnr. Mecki Schneider, voorsitter van die Namibiese Brahmantelersgenootskap, het op die Windhoekskou gesê die ras se gewildheid as voorrangras vind ook gestalte in kruisings. Sowat 70% van alle slagbeeste en speenkalwers het Brahmangene in hulle.
’n Deel van die sukses kan aan die genootskap se beleid toegeskryf word dat alle Brahmane individueel gekeur en in die databasis opgeneem word nadat hulle op grond van 15 eienskappe geëvalueer is. Die genootskap volg ook ’n streng, geordende opleidingsbeleid met beoordelaars en keurders.
Sowat 84% van die lede neem vrywillig aan prestasietoetsing deel en 92% het teelwaardes vir hul kuddes. Brahmantelers het verder die meeste stereerbewyse vir volledige dataaantekening van alle beesrasse in Namibië ontvang.
Internasionaal werk die Namibiese genootskap nou saam met SuidAfrika, Australië en Amerika rakende genomiese navorsing.
Skoue bly ’n aktiewe bemarkingsaksie. Die genootskap probeer om die nasionale kampioenskapskou, wat elke vier jaar plaasvind, verder uit te brei. Vanjaar is 200 stoetbeeste van 19 telers vir die kampioenskapskou in Windhoek ingeskryf.