REËN KAN NOG GROOT INVLOED OP PRODUKSIE VAN GROENTESAAD HÊ

Reënval kan in die komende paar weke nog ’n groot invloed hê op die hoeveelheid uie, sprietuie en wortelsaad wat vir die komende seisoen beskikbaar gaan wees.

Hoewel groot dele van Suid-Afrika se belangrikste produksiestreke vir groentesaad in die Wes-, Suid- en Noord-Kaap goeie winterreën gehad het, is dit nog nie genoeg vir groentesaadprodusente om met ’n geruste hart te boer nie.

“Water is maar altyd die faktor wat die verskil gaan maak in die produksie van groentesaad en ons sou nou, veral met die oog op ons aanplantings in Februarie en Maart volgende jaar van sprietuie vir saad, meer water in die verskillende damme in die Wes-, Suid-, en Noord-Kaap wou sien,” sê mnr. Tielman Cornelius, produksieraadgewer by Klein Karoo Saadproduksie.

Dié maatskappy, een van die grootste onafhanklike saadprodusente in die land, het kontrakkwekers in die vernaamste groentesaadproduksiestreke wat onder meer uiesaad, wortelsaad en sprietuie produseer.

Cornelius sê hoewel die Wes-Kaap en dele van die Suid-Kaap goeie reën oor die afgelope tyd gehad het, is daar distrikte wat nog nie genoeg reën gehad het nie. “Die Kammanassiedam het byvoorbeeld nog nie genoeg reën gehad dat ons heeltemal gerus kan wees nie, maar die reën wat ons intussen gehad het, gaan wel help om groentesaadproduksie in die komende seisoen aan te help. Intussen benodig die belangrikste groentesaadverbouingsgebiede egter nog reën,” sê hy.