BLOKTOETS VERBYSTER
’n Uitslagpersentasie van 61,56 van ’n graad C-Chianinakoei van mnr. Christiaan de Jager wys watter moontlikhede daar vir beesboere is om hul winsgrense te verhoog.
’n Uitslagpersentasie van 50 en 55 as die koei baie vet is en ’n ongewone liggaamsbou het, is ’n goeie riglyn vir die meeste beesrasse. Toe De Jager die 12-jarige Chianinakoei laat slag het, het dit bevestig wat hy lankal in die buiteland gehoor en self vermoed het: Daar is nog onontginde moontlikhede vir Suider-Afrika se boere om méér wins te maak en hul volhoubaarheid te verhoog.
Die koei is by die Klipeiland-slagplaas op Bronkhorstspruit geslag en ’n bloktoets is by die Uitkyk-vleismark in Pretoria gedoen. Die toets is met die samewerking van BKB
gedoen, wat die gewigte gemonitor het.
De Jager meen dit maak nuwe deure vir boere en ook vir kommersiële telers oop. ’n Hoë uitslagpersentasie beteken daar kom ’n groter karkas uit die geslagte bees, wat vir almal voordelig is.
Uitslagpersentasie is belangrik. As dié koei (wat 814 kg geweeg het) net 50% sou uitslag (wat die norm is), sou haar karkas 407 kg geweeg het. Danksy haar beter uitslagpersentasie het sy ’n karkas van 501,15 kg (koue gewig) opgelewer. Die verskil van 94,15 kg maak teen ’n prys van R38/kg ’n wesenlike verskil aan die bedrag wat ’n boer vir sy geslagte bees kry.
Die bloktoets het getoon die karkas het net 4,17% afvalbene gehad, veel minder as die gemiddelde 9,57% van standaardkarkasse wat by Uitkyk beland.
Die Chianina het ook net 7,84% harde vet gehad teenoor ’n algemene karkas se 9,68%. Bene en vet word teen ’n verlies verkoop en die keursnitte moet daarvoor vergoed. Nog goeie nuus is die hoër persentasie keursnitte, naamlik kruisskyf, klubskyf en filet.
Die bloktoets dien sommer ’n ander mite die nekslag toe, naamlik dat die Chianina “te groot” is. “Wins met beesboerdery begin by ’n hoë kalfpersentasie, wat ook ’n eienskap van die Chianina is, maar vir die voerkraal gaan dit oor die voeromsettingsverhouding (VOV) en uitslagpersentasie. Dís waar hul wins lê.”
Hy het van 2000 tot 2010 aan fase C-prestasietoetsing deelgeneem. Sy bulle se gemiddelde VOV was 5,01; met ander woorde hulle vreet 5,01 kg voer om 1 kg gewig aan te sit.