VOORDELE VAN KRUISTELING
Mnr. Christiaan de Jager het proewe vir swaarder speenkalwers gedoen deur Chianinabulle met Afrikaner-, Brahman-, Angus-, Pinzgauer-, Simmentaler-, Simbra-, Braunvieh-, Nguni-, Boran- en Bonsmarakoeie te kruis.
Die jongste proefkruisings was met die Wagyu, wat uitstekende resultate ten opsigte van marmering en veral groei en karkassamestelling opgelewer het.
Die kruisings lewer almal ’n speenkalf met ’n gladde haarkleed en goeie bespiering, groei, pigmentasie, temperament en skede. Die kalf bereik vinnig ’n bemarkbare gewig.
Hy het ook ’n Simmentaler-Chianinakruisbul by die Landbounavorsingsraad (LNR) se Instituut vir Diereverbetering by Irene vir ’n fase C-toets ingeskryf. Die bul se gemiddelde daaglikse gewigstoename van 2 436 gram/dag en voeromsettingsverhouding van 3,88 was die beste in dié toetsgroep. Sy daaglikse voerinname van 9,48 kg was slegs 2,25% van sy liggaamsgewig.
De Jager skryf ’n deel van die sukses met kruisteling daaraan toe dat die Chianina uit die Bos primigenius stam en geneties nie nou aan enige van die tipies Europese of plaaslike rasse in SuiderAfrika verwant is nie.
Die vleis word deur lae kilojoules en cholesterol (slegs 53 mg per 100 g vleis) en hoë proteïen (meer as 20%) gekenmerk, wat dit baie gesond en gesog maak. In Italië word dié vleis onder sy eie handelsmerk bemark en die welbekende Italiaanse Fiorentina verwys na ’n T-been afkomstig van ’n Chianina.