VERBOUINGSPRAKTYKE
In Australië word katoen hoofsaaklik binnelands in die state Nieu-Suid-Wallis (NSW) en Queensland verbou. Die totale aangeplante oppervlakte wissel na gelang van die reën van 200 000 ha tot 600 000 ha. Sowat 80% tot 95% daarvan word besproei.
Australië se gemiddelde opbrengs van katoen onder besproeiing is tans die hoogste van alle katoenproduserende lande en byna drie keer die wêreldgemiddelde. Die top-20% Australiese katoenboere behaal opbrengste van 12 tot 14 lintbale/ha onder besproeiing.
Die plase en gebiede wat besoek is, vergelyk goed met die heersende toestande op die Springbokvlakte. Die swart turfgrond met ’n hoë klei-inhoud en waterhouvermoë is soortgelyk aan die grootste deel van die vlakte, met die uitsondering van fosfaatvlakke wat inherent hoog is in die Australiese turfgrond vergeleke met die uiters lae vlakke op die Springbokvlakte.
Reënval is deur die bank die grootste bekommernis en beperkende faktor, maar met ’n gemiddelde jaarlikse reënval van 600 mm tot 700 mm lyk dit asof hulle steeds beter daaraan toe is as die boere op die Springbokvlakte.
Die gebruik van vloedbesproeiing met damme en kanaalstelsels is ’n gevestigde praktyk vir Australiese boere en hulle is voorlopers op dié gebied. Mnr. Will Coulton van Boggabilla het genoem dat hy en sy pa oorweeg het om nóg damme te bou, maar dat die waterbesparing van spilpuntstelsels aantrekliker is.
Mnr. Graham Clapham is ook besig om na lineêre besproeiingstelsels op sekere van sy blokke te kyk. Op die Springbokvlakte is die waterkwessie nóg meer relevant en op plase waar die topografie dit toelaat, moet die oprigting van damme om vloedwater op te berg, ernstig ondersoek word.
Op al die plase wat besoek is, was dit duidelik dat wisselbou en spesifieke gewasrotasieprogramme toegepas word. Gewaspryse skryf nie voor wat geplant word nie. Oorstaanlande is ’n kerndeel van sulke wisselbou-gewasrotasieprogramme. Die Australiese boere is baie gesteld daarop om vog te “bank” vir die komende seisoen.