Só staan Bayer en DEKALB by boere
Bayer staan bankvas agter Suid-Afrikaanse boere. Ondersteuning kom in die vorm van nuwe tegnologie, advies en nuwe kultivars in die DEKALB®-reeks wat mielieboere elke jaar tot hoër hoogtes lei.
Suid-Afrikaanse boere is van die produktiefste ter wêreld en pas by vernuwing aan soos geen ander land se boere kan nie. Dié stelling is onlangs weer op Agri SA se kongres in Pretoria gemaak.
Mnr. Jesus Madrazo, hoof van landbousake en volhoubaarheid in Bayer se afdeling vir gewaswetenskap, het gesê dit is waarom Bayer buitengewone moontlikhede vir beleggings in Suid-Afrika sien.
Madrazo was ’n spreker op die kongres en het met die grootste lof oor Suid-Afrikaanse boere gepraat.
Met die onlangse verkryging van Monsanto is Bayer nou die eienaar van staatmaker-handelsname, soos DEKALB®. Bayer het vanjaar ook voortgegaan met finansiële ondersteuning van die Agri Securitas-trustfonds.
“Suid-Afrikaanse boere het ’n Regering wat vernuwing steun. Daarom kan nuwe ontwikkelinge in ’n vroeë stadium deur Suid-Afrikaanse boere benut word. Dit gee aan hulle ’n mededingende voordeel teenoor lande wat stadiger by nuwighede aanpas,” het Madrazo gesê.
Hy het spesifiek verwys na Suid-Afrika se aanvaarding van GM gewasse. Dit het onder meer kleinboere gehelp om hul opbrengs van minder as 1 t/ha op te stoot tot tussen 4 t/ha en 7 t/ha deur beter insek- en onkruidbekamping.
Madrazo, wat Suid-Afrika al verskeie kere besoek het, het gesê die Suid-Afrikaanse landbou is ’n mikrokosmos van wat ’n mens in die res van die wêreld sien. Daar is groot kommersiële boere
wat internasionaal meeding en voortdurend hul produktiwiteit verhoog. Daar is egter ook kleinboere wat hard werk om ’n oes te behaal wat hul gesinne voed én welvaart skep.
“Ek is verheug om te kan sê dat die toekoms vir Bayer in Suid-Afrika lê. Die beleggings wat ons hier gemaak het, werp
reeds vrugte af.”
Madrazo het onder meer verwys na die saadaanleg en -laboratorium by Lichtenburg, navorsingsgeriewe by Petit, Rietgat en Malelane vir nuwe kultivarontwikkeling en ’n chemiese aanleg vir die formulering van produkte en saadbehandeling by Nigel.
Hy sê Bayer sien transformasie nie net as toegang tot die landbou vir meer mense in die land nie, maar ook transformasie tot ’n nuwe era van tegnologie tot voordeel van almal, waaronder nuwe toetreders tot die landbou.
WEN MET DEKALB
Die aanvaarding en gebruik van saadtegnologie dra by tot Suid-Afrikaanse boere se status as leiers op die gebied van produktiwiteit.
Een van die jongste stapelgeenbasters waarvoor boere in die komende planttyd op die uitkyk kan wees, is DKC75-65BR. Dié veelsydige witmieliebaster spog met ses uitstekende eienskappe wat dit ’n ideale keuse maak vir droëlandaanplanting in die oostelike en westelike mielieverbouingstreke. Dit is ook geskik vir besproeiing.
Een van dié kenmerke is die hoë en stabiele opbrengspotensiaal, die sterk meerkoppigheid en uitstekende blaarsiekteverdraagsaamheid. Stresverdraagsaamheid is ook goed.
Saailinge toon sterk opkoms en groeikragtigheid. Die bykomende voordele van saadtegnologie, soos YieldGard® Maize 2 vir insekbestryding en Roundup Ready® Maize 2 vir die breësprektrumbekamping van onkruide, is ook in dié kultivar ingesluit.
DEKALB® is die naam agter die weninskrywing van mnr. Zirk Scheepers van Cradock wat in die onlangse Weeg-en-Wen-kompetisie die beste opbrengs onder besproeiing behaal het. In dié kompetisie word die opbrengs van 2 ha, wat die boer uitkies, noukeurig gestroop en geweeg om in aanmerking te kom. Hy het met die geelmieliebaster DKC64-54BR ’n gemiddelde opbrengs van 20,72 t/ha op dié twee hektaar behaal!
“Dit het ’n baie goeie staanvermoë. Die kultivar is goed weerstandig teen plae en siektes, wat natuurlik ’n uitstekende eienskap is. Dit is ook ’n stabiele kultivar wat ’n goeie opbrengs lewer,” sê Scheepers.
NAVRAE: Webwerf: www.dekalb. co.za; tel. 011 790 8200.