Chianina: Staat kry bloedneus oor embrio-invoer
Ingevoerde embrio’s en semen kan tot die beskikking van alle telers gestel word.
DIE registrateur vir veeverbetering het vir ’n tweede keer bloedneus in die hof gekry oor sy weiering om die Chianina as ’n wettige beesras in Suid-Afrika te erken.
In die jongste saak is mnr. Joel Mamabolo, die registrateur, se weiering om goedkeuring te gee vir die invoer van Chianinaembrio’s en -semen op appèl ter syde gestel.
Mnr. Christiaan de Jager, wat met dié Italiaanse beeste by Badplaas in Mpumalanga, Catuane in die suide van Mosambiek en Montefiascone in Italië boer, beskou dit as ’n groot oorwinning vir die ras.
Die eerste nasionale Chianinaveiling vind op 10 November op Badplaas plaas.
De Jager sê die Chianina is in 1996 in Suid-Afrika geregistreer, en dus as amptelike ras erken. In 2007, sonder om enige teler of SA Stamboek daaroor te raadpleeg, het Mamabolo dit egter van die register verwyder.
BEVEL GEÏGNOREER
Regter John Murphy het Mamabolo se handeling in 2014 in die Gautengse Hooggeregshof ongeldig verklaar en ter syde gestel. Mamabolo het dié hofbevel geignoreer. Toe Keeman Belegging BK verlede jaar aansoek gedoen het om 1 881 embrio’s en 30 000 strooitjies semen in te voer, het Mamabolo die aansoek geweier op grond daarvan dat die Chianina nie ’n erkende ras ingevolge die Wet op Veeverbetering is nie.
“Dit is hierdie besluit waarteen geappèlleer is,” sê De Jager.
Adv. Z.Z. Matebezse, SC, prof. M.M. Scholtz en dr. L.E Matjuda het in Pretoria beslis Mamabolo het gefouteer.
De Jager sê die uitspraak bevestig die Chianina is ’n erkende ras. Dié status moet in die Staatskoerant reggestel word. Hulle het Mamabolo skriftelik verwittig dat hy binne sewe dae op die appèl moet reageer, anders lê hulle ’n klag van minagting van die hof.
TELERSGENOOTSKAP
“Die ras kan nou voortgaan met die registrasie van ’n telersgenootskap ooreenkomstig die aansoek wat geruime tyd reeds op die registrateur se tafel lê,” sê De Jager.
“Sodra dit geregistreer is, sal die genootskap as kenner van die ras oor die invoer van teelmateriaal inspraak lewer. Die registrateur se regte word dus ingeperk.
“Ingevoerde embrio’s en semen kan tot die beskikking van alle telers gestel word en is nie verder onderhewig aan beperkende voorwaardes vir die evaluering van die ras nie.”
Mnr. Keith Ramsey, die vorige registrateur, het op Facebook bevestig die Chianina het Suid-Afrika wettig binnegekom en was sedert die einde van die 1990’s ’n volledig geregistreerde en erkende ras ingevolge die wet.