Limpopo: AK47-bende teister boere
BOERE in die distrik Lephalale in Limpopo voer ’n toenemende stryd teen bendes misdadigers wat hulself deesdae met AK47-gewere bewapen.
Die boere ry elke nag patrollie in skofte van ses uur, terwyl hulle bedags boer.
Lede van die plaaslike veiligheidsforum met sy byna 500 lede gebruik radio’s om elke oggend en aand mekaar te kontak om seker te maak alles is wel. Hul radiobeheerkamer op die dorp, wat die boere self bedryf en op die been gebring het, werk 24 uur per dag.
Mnr. Douw Pelser, voorsitter van die veiligheidsforum, sê polisiestatistieke toon die meeste plaasaanvalle is op swart plaasbewoners, dikwels wanneer die aanvallers weet werkers het kontantlone gekry of het slimfone, wat maklik teen R6 000 tot R7 000 gesmous kan word.
Die gebied is ’n deurgang vir misdadigers van Johannesburg en Tshwane af na Botswana, Zambië en Zimbabwe deur Maartensdrif. Aanvallers kom dikwels vanaf die Gautengse woonbuurte Dobsonville en Alexandria, met binne-inligting oor wat wanneer op die plase te buit is.
‘NIE RASGEDREWE’
“As jou honde deesdae buite blaf, kan jy nie sommer net uitgaan om te kyk of dit ’n muskeljaatkat is nie. Jy moet twee keer dink om te keer dat hulle langs jou bed staan,” sê Pelser.
In een voorval is dr. Werner Emslie in September verlede jaar op sy plaas, Goedehoop, in die Afguns-gebied deur aanvallers doodgeskiet. Sy vrou, Mariëtte, ook ’n mediese praktisyn, en hul dogter, Barbara, is ernstig beseer.
Pelser meen die aanvalle is nie rasgedrewe nie. Dit het veral begin toeneem sedert Medupi, die nabygeleë steenkoolkragsentrale van Eskom, werkers die afgelope jare begin aflê het en gesinne ’n gebrek aan kos begin ervaar het, sê hy.
POLISIE ONONTBEERLIK
Hy voeg by dat die veiligheidsforum goed met die polisie saamwerk. Hulle vergader gereeld met onder meer lt.genl. Nneke Ledwaba, provinsiale kommissaris, en genl.maj. Jan Scheepers, sy adjunk. Dié polisiehoofde het landelike veiligheid in die gebied tot ’n voorrangsaak verklaar.
Vier landbou-organisasies – Agri SA, TLU SA, Nafu en Asafa – is in die forum verteenwoordig. Hulle werk almal saam onder die vaandel van die plaaslike gemeenskapspolisiëringsforum.
“Ons kan nie hierdie pad sonder die polisie loop nie,” sê Pelser.
Wat beveiliging op ’n plaaswerf betref, glo hy in opskerping en betrokkenheid.
“Maak seker jou buurman is by die netwerk betrokke en kan eerste reageer as daar ’n aanval op jou plaas is. Die polisie is nie naby genoeg om vinniger as jou buurman by jou uit te kom nie.”